Шахматтан жасөспірімдер арасындағы әлем кубогында 3 қазақстандық бірдей жеңіске жетті. Грузияда өткен жарыста Қазақстанның үш жас шахматшысы бірінші орын алды. Олар: Ризат Ұлан, Нұрәлі Болашақов және Милан Филиппова.
23 маусым мен 2 шілде аралығында Батумиде 8 бен 12 жас аралығындағы жасөспірімдер арасында шахмат тарихындағы бірінші ФИДЕ әлем кубогы (FIDE World Cup Under 8 – 1) өтті. Оған 288 жас шахматшы қатысқан, оның ішінде 20 қазақстандық бар. Олардың үшеуі бірінші орын тұғырынан көрінді.
«Өте жас болғанына қарамастан, Ризат, Нұрәлі және Милана шахмат тарихындағы алғашқы жасөспірімдер арасындағы Әлем Кубогының алтын медальдарын жеңіп алып, жоғары шеберлік пен жеңіске деген мызғымас ерік-жігерін көрсетті. Бұл нәтиже біздің елімізде шахматты насихаттау үшін ғана емес, сонымен қатар отандық шахмат мектебінің жоғары деңгейінің, жас таланттарды қолдау үшін таңдаған курстың дұрыстығының айқын дәлелі болып табылады. Чемпиондарымызға жаңа жеңістер тілеймін және олардың жаттықтырушыларына, туыстары мен жақындарына шын жүректен алғыс айтамын», – деді Қазақстан шахмат федерациясының президенті Тимур Турлов.
Жеңімпаздардың әрқайсысы кубок, медаль мен дипломнан бөлек, MacBook Air 2022 ноутбугын иеленген. Сонымен қатар 2024 жылдың 14-27 қарашасы аралығында Монтесильванода (Италия) өтетін кадеттер арасындағы әлем чемпионатында (World Cadets Chess Championships 2024) толық пансионаты бар 2 орындық бөлмеде тегін тұру құқығын алады.
Бұған дейін қазақстандық гроссмейстер Қазыбек Нөгербек шахматтан әлем чемпионы атанған. Алматыдағы жасөспірімдер арасындағы шахматтан Азия чемпионатында қазақстандықтар 12 алтын жеңіп алған болатын. Сондай-ақ ҚШФ өкілі елдегі шахмат спорты қалай қаржыландырылатынын айтып берген.
