Әнші Димаш Құдайбергеннің жаңа бейнебаянынан Қазақстанның туристік аймақтарын көруге болады. Бейнебаянды Туризм және спорт министрлігі мен Kazakh Tourism ұлттық компаниясы қолдаған.
Туризм министрлігінің ақпаратына сүйенсек, Бейнебаянда Шарын шатқалы, Көлсай көлдері, Ақмешіт үңгірі, Әзірет-Сұлтан қорық-музейі, Бозжыра шатқалы, Торыш алқабы, Бурабай, Қатонқарағай, Алтын-Емел, Жоңғар-Алатауы мемлекеттік ұлттық парктерінің керемет көріністері көрсетіледі.
«Жоба Қазақстанның бірегей сұлулығына назар аудартып қана қоймай, көрермендерге өнер туындысы арқылы елімізді жаңа қырынан көрсетуге жол ашады. Бейнебаян арқылы көрермендер Қазақстанды мәдени мұрасы бай, қайталанбас табиғаты бар ерекше мекен ретінде таниды деп үміттенеміз», – дейді туризм және спорт вице-министрі Ержан Еркінбаев.
Бейнебаянның басты мақсаты Димаштың жанкүйерлерін Қазақстанның табиғи және мәдени мұрасымен таныстыру болып отыр.
Еске сала кетейік, бұған дейін Димаш Құдайбергеннің Астандағы концертіне билеттер сатылымға шыққаны туралы жазған едік. 13 қыркүйек күні өтетін концертке барлық билет сатылып кеткеніне байланысты, әлемге әйгілі әнші келесі күні тағы концерт беретінін хабарлады.
Жақында Димаш Құдайберген Қазақ туризмінің амбассадоры ретінде Маңғыстаудың тарихи-мәдени жерлерін аралап шыққан. Киелі өңірдің руханияты, мәдениеті мен туризмін көрсететін деңгейі бөлек туынды әзірлеуді жоспарлап отыр.
