Air Astana әуе компаниясы Қазақстаннан Сауд Арабиясына жаңа рейстер ашады. Алматы-Медина, Шымкент-Мәдина, Шымкент-Жидда рейстері қазан айында іске қосылады.
«28 қазаннан бастап Шымкент-Жидда бір жиілігі аптасына 1 рет орындалатын Шымкент-Мәдина бағытына ауыстырылады. Сондай-ақ 29 қазаннан бастап Алматы-Мәдина бағытында аптасына 2 рет тікелей рейс іске қосылады», – делінген компания хабарламасында.
Рейстер бизнес-кластағы 16 орын мен эконом-кластағы 150 орын бар Airbus A321LR әуе кемесімен орындалады.
Ұшу ұзақтығы: Шымкент-Жидда және Шымкент-Мәдина рейстерінің ұшу ұзақтығы – 5 сағат 35 минут, Алматы-Мәдина – 6 сағат 10 минут.
Құны: Шымкент-Жидда бағыты бойынша екі бағытқа билет құны – 301 208 теңгеден басталса, Алматы-Мәдина – 336 882 теңгеден, Шымкент-Мәдина – 308 050 теңгеден басталады.
Айта кетейік, Қазақстан азаматтары Сауд Арабиясына сапар алдында электрондық виза алуы қажет.
Мәдина – мұсылмандардың Меккеден кейінгі екінші қасиетті қаласы. Пайғамбар мешіті ислам дінінің Меккедегі әл-Харам мешітінен кейінгі екінші киелі орны.
Жидда – Сауд Арабиясындағы көлемі жағынан екінші қала және елдің «экономикалық астанасы». Жиддадан Мекке қаласына жүрдек пойызбен бір сағатта жетуге болады.
Айта кетейік, Air Astana әуе компаниясы 2026 жылға қарай Қазақстаннан АҚШ-қа тікелей рейстер ашуды жоспарлап отыр. Компания 2025 жылға дейін Boeing ұшағына тапсырыс беріп қойған, тапсырыс уақытында келсе, Америкаға тікелей рейс те ертерек ашылатын болады.
