Мексикада өтетін «Әлем аруы-2024» байқауына қатысатын қазақ аруына киім үлгісін қырғызстандық дизайнер ұсынды, бұл туралы бүгін 24 қазан күні Алматы қаласының Өңірлік коммуникациялар қызметінің брифинг-алаңында айтылды.
Кездесу барысында 24 жастағы «Қазақстан аруы 2024» иегері Мадина Альмуханованың 28 қазан күні Қазақстанды әлемдегі ең беделді ареналардың бірінде таныстыру үшін Мексикаға баратыны айтылды.
Мадинаның сахнаға шығатын костюмдерді Орталық Азия халықтарының дәстүрлерінен шабыт алған әйгілі қырғыз дизайнері Арзубек Вонама жасаған. Бұл бейнелер Қазақстанның әлемдік аренадағы бірегейлігі мен өзіндік ерекшелігін көрсетуге арналған.
«Қазақстан аруы» байқауының PR-директоры Гүлім Советқан Мадина 16 қарашада өтетін байқауға дайындықтың соңғы кезеңінде екенін айтты.
«Мадина-бұл біздің еліміздің жарқын өкілі ғана емес. Ол «Әлем аруы» байқауын әлеуметтік маңызды мәселелерге, атап айтқанда тұрмыстық зорлық-зомбылық мәселесіне назар аудару үшін платформа ретінде пайдалануға ниетті. Мадина әйелдер құқығын жақтайды және зардап шеккендерді қолдауға, сондай-ақ қоғамдағы жаһандық өзгерістердің қажеттілігіне назар аударуды жоспарлап отыр», – деді Гүлім Советқан.
Merhat jewellery зергерлік брендінің маркетинг жөніндегі директоры Үміт Смағұлованың айтуынша байқауға қатысушының ұлттық костюмі үшін қазақ дәстүрлерінің рухын жеткізетін бірегей бас киім мен әшекейлер арнайы қолдан жасалынған.
Айта кетейік, Мадина Альмуханова 18 жасынан бастап модель болған. Ол Dolce & Gabbana, Intertop, Gucci және Yves Saint Laurent сияқты әлемдік брендтердің шоуларына қатысты. Модель ретіндегі табысты мансабынан басқа, Мадина Чайковский атындағы музыкалық колледжді «Хормейстер-дирижер» мамандығы бойынша бітірген, вокал мен фортепианода ойнауды кәсіби меңгерген. Болашақта ол өзінің музыкалық альбомын шығаруды жоспарлап отыр.
