Соңғы аптада қазақстандық кинотеатрларда кассалық табысы ең жоғары фильмдердің тізімі жарияланды. Ticketon билет операторының мәліметінше тізімдегі алғашқы орындарды тарихи және фантастикалық жанрдағы туындылар иеленді.
«Гладиатор 2» – 218 891 660 теңге
Екінші апта қатарынан көш басынан түспей келе жатқан әйгілі «Гладиатор» фильмінің жалғасы болды. Бұл тарихи эпопея көрермендерді эпикалық шайқастар мен драмалық оқиғаларымен баурап алды. «Гладиатор 2» фильмі аты аңызға айналған Максимус Децим Меридиустың оқиғасын оның ұлының өмірімен жалғастырады. Алғашқы бөлімнен кейін 25 жыл өткен уақытты қамтитын сюжет көрерменді Ежелгі Рим әлеміне жетелейді. Басты кейіпкердің Римді қорғау жолындағы ерлігі, әділдік үшін күресі, қызықты шайқастар мен интригалар фильмнің тартымдылығын арттырған. Қызықты оқиғалар мен керемет көріністер «Гладиатор 2»-ні экран алдында ұстап отыр.
«Злая, сказка о ведьме запада» – 134 867 255 теңге
Екінші орынға сиқыр мен шытырман оқиғаларға толы фантастикалық ертегі лайық деп танылды. Фильм ертегі жанрын ұнататындар арасында жоғары сұранысқа ие. «Злая» мюзиклі шыққанына бір апта ғана болса да 134 млн теңге жинап, екінші орынға жайғасты.
«Миссия Красный» – 69 462 185 теңге
Рождестволық комедия жанрындағы бұл фильм 3 апта бойы тұрақтылық көрсетіп үздік үштіктен түспей келеді. Дуэйн Джонсонның қатысуымен түсірілген экшн оқиғалары мен жеңіл әзілдері фильмнің табысты болуына ықпал етті.
«Шекер» – 64 954 760 теңге
Алдыңғы апталарда үздік үштіктен түспей келген «Шекер» фильміне осы аптада сұраныс азайды. Фильмде бас кейіпкер есірткі тасымалы үшін айыпталып, түрмеге түседі. Оның болашағы бұлыңғыр болып, мансабы құрдымға кетеді. Түрмеден босап шыққан кейіпкер бостандыққа ұмтылып, жақындарымен қарым-қатынасын қалпына келтіруге тырысады. Толық залдар жинап жатқан бұл фильм бұл аптада төртінші орынға түсті.
«Заманбек» – 58 019 780 теңге
Прокатқа шыққанына алты апта өтсе де, «Заманбек» фильмі көрерменді әлі де қызықтырып жүр. Бұл тарихи-драмалық туынды отандық киноиндустрияның тағы бір жетістігі ретінде танылып, бесінші орынға тұрақтады.
Еске сала кетейік, өткен аптада «Жезтырнақ» атты хорор-комедия жанрындағы жаңа кинотуынды шыққан. Kursiv LifeStyle бұл фильмнің жаңашылдығы мен ерекшеліктері туралы жазған еді.
