Астанада жүк көлігінің жанармай багы жарылып, 3 адам зардап шекті

Астана қаласында жүк көлігінің жанармай багы жарылып, үш адам зардап шекті. Сарыарқа ауданындағы үш қабатты әкімшілік ғимараттың бірінші қабатындағы бокста өрт шыққан.

Төтенше жағдай министрлігінің хабарлауынша, өрт сөндірушілер келгенше, бокста тұрған жүк көлігінің жанармай багы жарылып өртеніп кеткен. Мамандар қалған екі көлікті ғимараттан алып шыққан.

«Өрт кезінде бокс ішінде 3 жүк автокөлігі болған, өрт сөндірушілер екі автокөлікті өрттен құтқарып қалды. Өрт салдарынан 3 адам зардап шекті, олар медициналық жедел жәрдем қызметкерлеріне тапсырылды», – делінген ТЖМ хабарламасында.

️Өрт жалпы 15 шаршы метр алаңды қамтыған.

Бұған дейін Алматы қаласының орталығындағы кафенің шатыры өртеніп, өрт сөндірушілер бірден отты оқшаулаған.