Желтоқсан айын күтуге себеп көп. Бұл айда қала ерекше ажарланып, жаңажылдық көңіл күй пайда болып қоймайды. Бұл айда бәріміз теледидар немесе ноутбук алдына телміреміз. Себебі біз асыға күтетін бағдарламалар мен сериалдар жарыққа шығады. Биылғы желтоқсан да көптен күткен сериалдардың премьерасына толы болмақ.
«Жұлдызды шайқас» – Star Wars Skeleton Crew – 3 желтоқсан
Сюжет кішкентай бір планетада өмір сүретін төрт мектеп оқушысы Вим, Ферн, Нил мен Кей Бидің айналасында өрбиді. Бұл төрттік бір күні орманда жүріп көптен адам баспаған джеди храмын тауып алады, ішінен ғарыш кемесін көреді. Осы сәттен бастап он жасар саяхатшылардың қызыққа толы, шытырман оқиғаға бай күндері басталады. Олар ғарышта адасып, дроид SM-33-пен танысып, нағыз джеди Джода На Навуда деген нағыз тәлімгер тауып, үйге оралар жолды іздейді.
Star Wars Skeleton Crew сериалының сюжеті фильмнің «Джедидің оралуы» деп аталатын алтыншы эпизодтың жалғасы ретінде шығады. Жұмбақ Джеди рөлін бұл жобада Джуд Лоу сомдаған.
Көпшілік күтіп жүрген сериалдың премьерасы 3 желтоқсанға бекітілген.
Bad sisters – «Апалы-сіңілі Гарвилер» – 4 желтоқсан
Сериалдағы оқиға Ирландиядағы шағын қалашықта өрбиді. Сюжет бес апалы-сіңілі Гарвилер – Ива, Грейс, Биби, Урсула және Бекка төңірегінде өрбиді. Олар ата-анасынан ерте айрылып, үнемі бір-біріне қорған болуға уағдаласады. Ештеңеге қарамастан, бірі екіншісін қолдап, үшіншісі жұбаныш болуға келіседі. Апалы-сіңілі бес қыз қыл өтпестей тату болып өседі, алайда бір адам олардың өміріне кері әсер етеді, ол – Грейстің күйеуі. Джон Пол үнемі әйелін кемсітіп, Иваның мәнсабын құртып, Беккаға жеке кәсіп ашуға кедергі келтіріп, Урсуланың жеке өміріне араласа беретін болады. Тіпті оның кесірінен Биби көзінен айрылып қалады. Күндердің бір күнінде ағайынды Гарвилер ақылдасып, бастарына келген қиындықтан шығар жалғыз жол Джон Полды өлтіру деген шешімге келеді.
Апалы-сіңілі Гарвилер туралы бұл сериал – триллер элементтері қосылған комедия. Авторлар туындыны жарыққа шығармас бұрын белгиялық «The Clan» сериалынан шабыт алғанын да айтқан.
Bad Sisters сериалынан көрермен Шэрон Хорган, Ив Хьюсон, Дэрил МакКормак, Клас Банг, Энн-Мэри Дафф, Сара Грин, Ева Бертистл, Брин Глисон, Ассаад Буаб, Маив МакГрат сияқты актерларды көре алады.
The Fiery Priest –«Күйгелек дін қызметкері», 6 желтоқсан
Ким Хэ-илья бұрын әскери қызметте істеген. Ал қазір ол – католик шіркеуінде діни қызметкер. Ол кез келген ұсақ-түйекке ашулана береді, ашу қысқанда өз-өзін басқара алмай қалады. Пасторды өлтіргенде Ким мырза қылмыскерді табу үшін прокурор әйелмен және епсіздеу полиция қызметкерімен күш біріктіруге бел байлайды.
«Күйгелек дін қызметкері» деп аталатын корей сериалы – бір-біріне мүлдем ұқсамайтын әрі эмоциялық тұрғыда тұрақсыздау үш түрлі адамның бірлескен жұмысы туралы криминалдық комедия. Сериалдың бірінші маусымы 2019 жылы шыққан. Екінші маусымның премьерасы 6 желтоқсанда деп болжанып отыр.
Рөлдерді Ким Нам-гиль, Ким Сон-гюн, Ли Хони, Джун Ко және Кым Са Рук сомдаған.
Abbott Elementary – «Эбботт» бастауыш мектебі, 7 желтоқсан
Документалдық фильм авторлары Филадельфиядағы ең нашар мектеп жайлы фильм түсіріп жатады. Жеткілікті қаржы бөлінбейтіні, жетекшіліктің біліксіздігі, қажет жағдай жасалмағын оқу процестеріне кері әсер етеді. Алайда мұның бәрі ісін шын сүйетін мұғалімдерге мүлдем әсер етпейді. Сондықтан болса керек, фильм түсіріп жатқандардың объективіне барлық қиындыққа қарсы тұрып, жағдай жоқ екеніне қарамастан, оқушыларына білім беруге тырысып жүрген қайсар педагогтар ілігеді. «Эббот» мектебінің қаһармандары ретінде бастауыш мектептің мұғалімдері Джанин Тигс пен Мелисса Шемменти және балабақшада тәрбиеші болып істейтін Барбара Ховард, тарих пәнінің мұғалімі Джейкоб Хилл және тәжірибесі аз директор Ава Коулман ерекше көзге түседі.
Abbott Elementary – «Эбботт» бастауыш мектебі – комедиялық сериал. Туынды алғаш 2021 жылы көрермен назарына ұсынылған. Осы аралықта шығармашылық ұжым «Эмми» және «Алтын глобус» сияқты марапатқа ие болып үлгерді. Биыл 7 желтоқсанда сериалдың төртінші маусымы жарыққа шықпақ.
Dream Productions – «Арман студиясы», 11 желтоқсан
Танымал және тәжірибелі режиссер Паула Персиммон және арманы асқақ режиссер Ксени жасөспірімдік кезеңнің барлық қуаныштары мен қиындықтарын бастан кешірген Райли үшін жаңа экшнге толы арманды сахналау үшін шығармашылық амбицияларын біріктіреді. Аудиторияға таныс эмоциялар – Қуаныш, Ашу, Қайғы, Қорқыныш және Жиіркеніш – жұмыс процесін орнатуға және түсіру алаңындағы қақтығыстарды шешуге тырысады.
«Dream productions» анимациялық сериясы жалған деректі фильм стилінде түсірілген және 12 жасар Райлидің басынан «Ойжұмбақ» және «Ойжұмбақ 2» фильмдерінің арасында болып жатқан оқиғалар туралы баяндайды.
Жақында ғана қазақстандық кинопрокатқа ұсынылған «Ойжұмбақ 2» 125 миллион теңге касса жинап, дубляждалған туындылар арасында рекорд орнатқан еді. Елімізде мультфильмді екі тілде 900 мыңнан аса адам тамашалаған. Жалпы «Ойжұмбақ – 2» мультфильмі Орталық Азияда және Кавказда 4,5 миллион доллар (2,08 млрд теңге) жинаған. Осылайша анимация аймақта тағы бір рекорд орнатты.
Disney-дің кезекті туындысы 11 желтоқсаннан бастап көрермен назарына ұсынылады.
«Жүз жылдық жалғыздық» – 11 желтоқсан
Габриэль Гарсиа Маркес үнемі өзінің 1967 жылы жазылған «Жүз жылдық жалғыздық» деп аталатын романын экрандауға келісім бермейтін. Ол ойдан шығарылған Маконда деген ауылда тұратын Буэндиа әулетінің жеті ұрпағы жайлы айтылатын шығармасын бірде-бір фильм толық баяндап шыға алмайды деп есептейтін. Гарсиа Маркес 2014 жылы дүниеден өтті, кейін оның екі ұлы шағын сериал түсіруге келісім берді. Алайда олар сериал Колумбияда және испан тілінде түсірілуі керек деген талап қойды.
Көрермен бұл ойдың қаншалық жүзеге асқанын, қаншалық сәтті шыққанын 11 желтоқсан күні біле алады. Себебі дәл осы күні Netflix-те 11 сериялық туынды жарыққа шығады.
Рөлдерден көрермен Клаудио Катаньоны, Жеронимо Баронды, Марко Гонзалезді, Леонардо Сото мен Сузана Моралесті, Элла Бесерра және Сантьяго Васкесті, Карлос Суаресті, Морено Борханы тани алады.
«Жүз жылдық жалғыздық» – Макондоның кішкентай тұрғынының әңгімесі ғана емес. Романда Колумбияның жүз жылға таяу тарихы толығымен көрініс алады. Бұл дәуір елдегі әлеуметтік өзгерістердің, аумалы-төкпелі заманның шағы еді: азаматтық соғыс, Солтүстік Америка компаниясының Колумбия өміріне етене араласып кетуі. Түрлі тақырыпты қамтитын шығарманың қалай экрандалғаны қызық болса, 11 желтоқсанда желіге кіріңіз.
«Кальмар ойыны» – 26 желтоқсан
2021 жылы Squid Game деп аталатын ерекше сериалдың премьерасын көріп, ешкім бұл «ойынның» екінші маусымы болатынын ойламаған. Алайда балаларға арналған ойын іспетті сценарий, онда жеңген адамның байлыққа кенеліп, ұтылғандардың бәрі өліп қалатыны, бұған қоса тек бір жеңімпаз болатыны, олардың қызыл-жасыл костюмдері – бәрі-бәрі күллі әлемнің корей телевизиясына деген қызығушылығын арттырды. Содан болса керек бірнеше жыл өтсе де, бұл сериал рекордтық орнын ешкімге бермей, Netflix тарихындағы ең көп қаралған шоу атағына айқын иелік етіп келеді.
Жүздеген адамның арасынан жалғыз өзі тірі қалып, жеңімпаз атанған және үздік ер адам рөлі үшін «Эмми» сыйлығын алған Ли Чон Чжэ екінші маусымда да көрерменді қуантады. Сонымен қатар басты рөлдерді Пак Хэ-су, Ви Ха-джун, Чон Хо-ен, Ен су О, Хо Сон-тхэ, Анупам Трипати, Ким Чу Рен, Ли Бен-хон, Кон Ю, Ли Ю-ми сомдаған.
Биылғы сюжет бойынша ол ойынды түбімен жоямын деген оймен «Кальмар ойынын» қайта ойнауға бел буады. Бұл жолғы ойында да ұтылғандар өлім құшады, ал келесі кезеңге өткендерге қызыл шам жанып, таңдау мүмкіндігі беріледі. Осылайша ол әр кезеңге өтпес бұрын ойынды әрі жалғастыруды немесе бұрынғы кедей өміріне қайта оралуды таңдай алады.
Squid Game сериалының премьерасын күтіп жүргендер көп. Сериалдың екінші маусымы әлем бойынша 26 желтоқсан күні Netflix-те жарияланады.
