Желтоқсан айы – жылдағы ең белсенді өтетін әрі тез өте шығатын ай. Себебі жылдың соңғы айында мереке-мейрам да көп, әрі олай болмаған күннің өзінде бұл ай – барлығы үшін қорытынды айы. Барлық адам желтоқсанда өзінше ойға шомып, өз-өзіне есеп береді. Дәл солай ел алдында жүрген өнер адамдары да осы айда халыққа мерекелік көңіл күй сыйлап, бір жағынан қорытынды кешін өткізіп абыр-сабыр болып жатады. Сондықтан бұл айда баратын жер көп. Әдеттегідей алдағы аптаның ең қызық іс-шараларын бір тізімге жинадық.
«Шаншар» әзіл–сықақ театрының 30 жылдық мерейтойы
Астана қаласы
16 желтоқсан
«Шаншар» әзіл-сықақ театры сахнада 30 жылға жуық уақыт бойы өнер көрсетіп, ел таныған елеулі ұжымға айналды. Астана тұрғындарының алдағы жылы желіде танымал видео болып тарайтын керемет сахналық көрініс пен монологты біріншілердің бірі болып тамашалау мүмкіндігі бар. Себебі шығармашылық ұжым алдағы апта елордалық көрерменіне арнап концерт береді.
«Шаншардың» әрбір қойылымы көрермен көңілінен шығады, әзілі ішек-сілені қатырып, күлкіге қарық қылып, өткір пародиялары арқылы ұжым үнемі маңызды мәселелерді көтереді. Сонымен қатар әр қойылым көрермен жадында жылдар бойы сақталып, тамаша естелікке айналады. Ал қойылымдағы астарлы әзіл сөздер мен тіркестер халықтың әзіл-әжуа лексиконына мықтап сіңіп те кетеді. Осы жылдар ішінде ұжым қазақстандық әзіл әлемінің символына айналды десек артық айтқанымыз емес.
Алдағы концертте «Шаншар» өзінің адал көрермені үшін арнайы жасалған жаңа бағдарламасын ұсынады. Жаңа комедиялық жауһарларға куә болу мүмкіндігінен қапы қалмаңыз. Астанада өтетін кеш 16 желтоқсан – Тәуелсіздік күнімен тұспа-тұс келіп тұр. Бейбіт замандағы шалқыған көңіл-күйдің белгісіне айналған әзіл майталмандары елордадағы Е. Рахмадиев атындағы Мемлекеттік академиялық филармонияның концерт залында өнер көрсетеді.
Бұл күні ұжым бірден екі концерт береді, бірі сағат 16:00-де, екіншісі 20:00-де басталады.
Билеттерді Ticketon.kz сайтынан таба аласыз.
Retro Show ретро әндер кеші
Шымкент қаласы
17 желтоқсан
Retro Show – бұл әйгілі музыканың алтын дәуіріне елітіп әкететін теңдессіз музыкалық саяхат. Батырхан Шөкенов, Майкл Джексон, Элвис Пресли және басқа да көптеген шеберлердің қайталанбас әуендеріне көмкерілген мерекелік атмосферада нағыз сапалы әрі есті әнсүйер қауыммен бас қосып, сүйікті хиттерді тыңдап әрі өткеннің қайталанбас рухын сезіну мүмкіндігінен қапы қалмаңыз!
Brasswood – ретро-музыка рухын жеткізуге ұмтылған дарынды музыканттар тобы. Олар тыңдарманын музыкалық естеліктер әлеміне жетелеп, өз аудиториясына ұмытылмас әсерлер сыйлауға асық.
Барлық әндер бірегей вокалдық-аспаптық өңдеуде орындалады. Жас күніңізді бір еске алып, Батырханның лирикалық әуенімен ой сергітіп, Элвис Преслидің ырғақты әніне бұрала билеп, рухани тынығып қайтыңыз – нағыз керемет кештің рецебі де осы болса керек.
Концерт 17 желтоқсан күні Шымкент қаласындағы «Түркістан» концерт залында өтеді. Басталуы сағат 20:00-де.
Билеттерді Ticketon.kz сайтынан таба аласыз.
Садраддиннің жеке ән кеші
Астана қаласы
22 желтоқсан
SADRADDIN – жас талант, 18 жасында жарқ етіп шығып, желіде жұлдызы жанған дарынды әнші. Оның 2020 жылғы карантин кезінде әлеужеліге жүктелген «Әлия» оны тыңдарман арасында вирустай тарап, қарапайым жігітке керемет танымалдық сыйлады. Әнші әлі күнге сол күндері әннің осынша таралып кетерін күтпегенін айтады. Садраддиндің қазір тек Қазақстан емес, алыс-жақын шетелдерде де сүйіп тыңдайды. Оның бірегей стилі заманауи поп әуендерін дәстүрлі қазақ сазымен үйлестіреді, бұл әрбір әнді қайталанбас және әр тыңдаушыға жақын етеді.
Садраддин – өте еңбекқор әнші, ол тыңдарманын зарыға күттірмей жиі-жиі жаңа ән шығарып отырады. Ал әр жаңа ән шыққан сайын жас дарынның танымалдығы одан сайын артып,YouTube-тағы бейнебаяндарының қаралым саны да миллионнан ағып жығылып жатыр.
Осы еңбекқорлығының арқасында болса керек, ол тарихта болмаған шоу жасап, тамаша нәтижеге қол жеткізіп жүр. Мысалы былтыр қыркүйекте небәрі 19 жасында 12 000 адамды жинап, концерт берді. Ал биылғы қыркүйектегі концертіне әнші 30 000 мың тыңдарман келгенін мақтана айтып жүр. Бұл – расында ғаламат жағдай.
SADRADDIN-нің әрбір өнер көрсетуі – шынайы шоу, онда көрермендер тек музыка тыңдап қоймай, қызықты көріністің бір бөлігіне айналады. SADRADDIN-нің кештерінің қайталанбас атмосферасы мен жанды дауыста өнер көрсетуі әрқашан ұмытылмас әсер қалдырады.
Осынау бірегей музыкалық оқиғаның бір бөлігі болу мүмкіндігін жіберіп алмаңыз! SADRADDIN концертіне келіп, Астанадағы музыканың шынайы сиқырын сезініңіз! Сүйікті әншіңізбен бірге «Грустный танец», «Жауап бар ма?», «Ант», «Аман болшы, сүйгенім», «Үйге», «Ана» және тағы басқа танымал әндерді бірге шырқаңыз.
Кеш 22 желтоқсан күні Астанадағы Конгресс холда өтеді. Басталуы сағат 19:00-де.
Билеттер Ticketon.kz сайтында.
Ғазизхан Шекербеков пен Диана Исмаилдың ән кеші
Орал қаласы
22 желтоқсан
Ғазизхан Шекербеков – заманауи Шәмші аталып кеткен лирик әнші, танымал композитор, көптеген хит әннің орындаушысы әрі авторы. Диана Исмаилова да солай, ол да – барқыт даусымен ерекшеленіп тұратын дарынды әнші. Диананы да жұрт көп хит әннің авторы ретінде жақсы біледі. Соның ішінде ең танымалы – әрине, Ерке Есмахан орындайтын «Қайда?» әні.
Бұл екі тамаша орындаушы Оралдағы ән сүйер қауым үшін қосылып ән кешін бермек. Ғазизхан мен Диананың тамаша тандеміне көпшілік ұлттық арнадағы «Жұлдызды жекпе-жек» жобасында куі болды, тыңдарман бұл дуэтті ерекше ұнатты, қолдады. Алайда жұп жобадан ерте шығып кеткендіктен, дуэттің ерекше орындауына, ерекше үйлесіміне тоймай да қалғандай болды.
Сондықтан Ғазизхан мен Диананың қосыла ән шырқап, бір сахнада ортақ кеш беруі – халықтың сұрауы.
Алайда бірі білсе, бірі білмес, қос әнші бұған дейін сахнаға бірге шығып, дуэт болып бірнеше рет ән айтқан. Тіпті олардың «Сен мені кешір» деп аталатын әніне түсірілген бейнебаян YouTube желісінде миллионнан аса қаралым жинаған.
Дуэтті былай қойған күннің өзінде, Ғазизхан да, Диана да өз алдына әрқайсы керемет әншілер, әрқайсының миллиондаған тыңдарманы бар. Олардың әр әні жүрекке жетеді, есте мәңгі сақталады. Ғазизханның «Мен сені сағындым», «Мен сүйсем сүйемін», «Сезім үшін», «Қайдан ғана жолықтың», «Ұлыма», Еркекпін мен”, «Көріктім», «Аға» және басқа көп әні бар және бәрі дерлік хит. Диананың да сезімге толы «Кездесер», «Сені кездестіргелі», «Ауылым» және басқа танымал әні баршылық. Тіпті осы тізімді оқып отырып, ән әннің атауын оқыған сайын сіз де әндетіп кеткеніңізге күмән жоқ. Ал осы және тізімге енбей қалған талай әнді алдағы жанды дауыста тыңдай аласыз. Тамаша емес пе?
Ерекше үнімен ғарышқа елітіп әкететін қос әншінің керемет кешінен қапы қалмаңыз. Бұл, шынында, рухани ләззат сыйлайтын концерт болмақ.
Кеш Орал қаласы, 5-шағын аудан, 12а мекенжайы бойынша орналасқан «Атамекен» мәдениет сарайында өтеді. Басталуы сағат 19:00-де.
Билеттерді Ticketon.kz сайтынан таба аласыз.
Ернар Айдардың ән кеші
Қарағанды қаласы
17 желтоқсан
Ернар Айдар – қазақтың ең танымал орындаушыларының бірі, нағыз хитмен. Оның репертуары заманауи хиттер мен алуан түрлі жастағы ән сүйер қауымды қамтитын сан түрлі әнге бай. Әншінің концерттері ешқашан қарапайым қарабайыр болып өткен емес, тыңдармандары үнемі концерттер нағыз музыкалық шоу ретінде әрі ашық сезімдер мен көрермен қауыммен ерекше эмоциялық байланыс орнайтын атмосфералық кеш болатынын айтып жүреді.
Ернар өзінің сахнадағы еркіндігімен, жүрекке жеткізіп орындай алатынымен, залдағы тыңдарымен байланыс құра алатынымен танымал.
Ернар Айдардың концерті жақсы әсер сыйлайтын, желтоқсандағы суық кешке жылу беріп, аязды күннің сәнін келтіретін кеш болғалы тұр.
Концерттен қапы қалмаңыз, кеш 17 желтоқсан күні Қарағанды қаласындағы «Кеншілер» мәдениет сарайында өтеді. Басталуы сағат 19:00-де.
Билеттерді Ticketon.kz сайтынан сатып ала аласыз.
Бұл – алдағы аптада болатын ең таңдаулы ән кештерінің топтамасы. Ticketon.kz сайтына кіріп, аптаңызды қызықты ететін өзге де іс-шаралар жайлы ақпарат ала аласыз.
