Лос-Анджелесте өткен Голливудтың Шетелдік баспасөз қауымдастығы ұйымдастырған 82-ші «Алтын глобус» сыйлығының табыстау рәсімінде «Сегун» драмалық сериалдар арасында «Үздік драмалық сериал» номинациясында жеңімпаз атанды.
«Сегун» жұлдыздары үздік актер және актриса атанды
Сериалда басты рөлдерді сомдаған актер Хироюки Санада мен актриса Анна Сава «Драмалық сериалдағы үздік ер адам рөлі» және «Драмалық сериалдағы үздік әйел адам рөлі» номинацияларында жүлдеге ие болды.
Мини-сериалдар және комедиялық сериалдар жеңімпаздары
«Үздік мини-сериал» номинациясында «Олененок» сериалы жеңімпаз деп танылды. Мини-сериалдағы үздік актер және актриса атақтары «Пингвин» фильміндегі Колин Фаррелл мен «Нағыз детектив: Түнгі ел» фильміндегі Джоди Фостерге бұйырды.
Комедиялық сериалдар арасында «Хитрости» сериалы үздік деп танылды. Бұл жанрдағы үздік актер және актриса номинацияларын Джереми Аллен Уайт («Аю») және Джин Смарт («Хитрости») жеңіп алды.
Сонымен қатар «Алтын глобус» жүлдесінің иегерлері қатарында Деми Мур мен Эдриен Броуди ерекше аталды. Деми Мур «Субстанция» фильміндегі рөлі үшін «үздік актриса» атанса, Эдриен Броуди «Бруталист» фильміндегі рөлі үшін «Драма жанрындағы үздік актер» номинациясында жеңіске жетті.
«Бруталист» фильмі «Үздік фильм – драма» номинациясында топ жарды. Сонымен қатар, фильмнің режиссері Брэди Корбей «Үздік режиссер» атағына ие болды.
«Эмилия Перес» фильмі «Үздік фильм – комедия немесе мюзикл» номинациясында жеңіске жетті. Сонымен қатар, картина «Үздік шетелдік фильм» жүлдесін де қанжығасына байлады.
Фильмдегі екінші пландағы рөлі үшін Зои Солдана «Екінші пландағы үздік актриса» марапатын иеленді. Бұдан бөлек, «Эмилия Перес» фильмі «Фильмдегі үздік ән» номинациясында да жеңіске жетті.
«Алтын глобус» – кино және телевизия саласындағы үздік жұмыстарға берілетін американдық сыйлық. Бұл жүлде 1944 жылдан бастап Голливудтың Шетелдік баспасөз қауымдастығы тарапынан тағайындалады. Сыйлық жыл сайын қаңтар айында 90-ға жуық халықаралық журналистердің дауыс беру нәтижесі бойынша табысталады.
