Samsung компаниясы жаңа Galaxy S25 смартфондар сериясын таныстырды. Жаңа құрылғылар жасанды интеллектінің (ЖИ) кеңейтілген мүмкіндіктерімен жабдықталған үш модельден тұрады: S25, S25+ және S25 Ultra.
Қазақстандағы бағалары S25 моделі 539 мың теңгеден басталса, ең қымбат үлгі S25 Ultra 1 млн теңгеден асады. Смартфондардың сатылымы 7 ақпан күні басталады.
ЖИ мүмкіндіктері және жаңа процессор
Жаңа S25 сериясында смартфондар бірнеше қосымшаларда бірден жұмыс істей алады. Мысалы, Spotify, WhatsApp, Samsung және Google қосымшалары. Пайдаланушылар телефонды қажетті іс-шараны іздеп, оны күнтізбеге қосуға, немесе үй жануарларына рұқсат беретін кафелерді тауып, бұл ақпаратты басқа байланысқа жіберуге сұрай алады. Сонымен қатар ЖИ пайдаланушы сұранысы бойынша телефон баптауларын өзгертеді.
Жасанды интеллектінің бұл мүмкіндіктерін қуаттайтын жаңа процессор Qualcomm компаниясымен бірлесіп әзірленді. Snapdragon 8 Elite чипі жылдам әрі энергияны үнемдейтін процессор ретінде ұсынылып отыр, бұл құрылғының батарея қуатын тиімді пайдалануға мүмкіндік береді. Компанияның мәлімдеуінше, бұл чип Galaxy құрылғылары үшін бұрын-соңды қолданылмаған ең жылдам процессор.
Камера және дизайндағы өзгерістер
Galaxy S25 Ultra моделі жақсартылған камерамен жабдықталған, ал дизайнда өткір бұрыштардың орнына жұмырланған шеттер қолданылды. Бұл өзгеріс құрылғыны пайдаланушыларға ыңғайлырақ етеді.
Нарықтағы бәсекелестік
Samsung жаңа мүмкіндіктерімен Apple сияқты ірі бәсекелестерімен қатар, Xiaomi секілді Қытай брендтерімен де бәсекелесуді жалғастырып жатыр. Компанияның пікірінше, жаңартылған функциялар тұтынушылардың сенімін нығайтуға және нарықтағы үлесін сақтап қалуға көмектеседі.
Еске сала кетейік, бұған дейін Apple 2025 жылы шығаратын бағасы қолжетімді өнімдер туралы жазған едік. Олардың ішінде жаңа Iphone, Ipad, Apple Watch және т.б.
