Қаржы мониторингі агенттігі төрағасының орынбасары Жеңіс Елемесов QirSabyn Telegram-арнасының әкімшілерін ұстау жайлы журналистер сұрағына жауап берді.
Қаржы мониторингі агенттігі өкілінің сөзінше, агенттік күмәнді қаржылық операцияларды тұрақты түрде қадағалайды.
«Егер біз белгілі бір транзакциялардың қылмыс жасауға қолданылуы мүмкін екенін анықтасақ, терең талдау жүргізіп, істі тиісті құқық қорғау органдарына тапсырамыз. Бұл да сондай жағдайлардың бірі, әрі қарай тергеуді басқа органдар жүргізеді», – деді Елемесов.
Қазақстанда қылмыстық жолмен алынған кірістерді заңдастыруға қарсы заң бар.
Оған сәйкес, қаржы мониторингінің субъектілері белгіленген шектен асатын немесе күмән тудыратын транзакциялар туралы ақпарат беруге міндетті.
Еске салсақ, 2024 жылғы 20 желтоқсанда Бас прокуратура QirSabyn анонимді Telegram-арнасының әкімшілерінің ұсталғанын хабарлаған. Құзырлы органдардың мәліметінше, Астана мен Қарағандыдағы бір топ QirSabyn арнасын пайдаланып, жалған немесе беделге нұқсан келтіретін ақпарат жариялау қаупімен адамдардан ақша бопсалаған.
QirSabyn – Қазақстандағы танымал тұлғалар, саясаткерлер немесе блогерлердің жеке өміріне қатысты ақпараттар жариялауымен танымал болды. Бірақ оның дереккөзі, рас-өтірік екендігі белгісіз. Арнаның аудиториясы 110 мыңнан асады.
