6 сәуір – БҰҰ бекіткен Даму мен бейбітшілік жолындағы Халықаралық спорт күні. Бұл дата 1896 жылы Афиныда өткен алғашқы Олимпиада ойындарының ашылу салтанатына орай белгіленген. Мерекенің мақсаты – спорттың денсаулықты нығайту, халықтар арасындағы ынтымақ пен түсіністікті дамытудағы рөлін насихаттау. Осыған орай TikTok желісінде спортты дәріптеп, миллиондаған адамды салауатты өмір салтына ынталандырып жүрген қазақстандық контент авторларын ұсынамыз.
Қазіргі заманның батыры
Сергей Цырульников – әлемнің жеті мәрте рекордшысы, Гиннестің рекордтар кітабына енген әйгілі қазақстандық күш атасы. Сергейдің ерекше қабілеттері мен батырлық бейнесі оны Қажымұқан Мұңайтпасұлы мен Балуан Шолақ сынды тарихи тұлғалармен салыстыруға негіз береді. TikTok-тағы видеоларында грелка үрлеу, тағаны бүгу, шегені түйінге айналдыру секілді күш шеберлігін көрсетеді. Бұдан бөлек, Сергей жастарды спортқа баулып, күш-қуат пен денсаулықты насихаттайды.
Воркаут алаңының ханшайымы
Келесі кейіпкеріміз – стритлифтингтен халықаралық дәрежедегі спорт шебері әрі жеке жаттықтырушы Элена Золотухина (@helena_zolotukhina). Азия кубогында қос сайыстан 67,5 келі нәтижемен элита атағына ие болған әлем рекордшысы. Элена спортқа әлем чемпионатының трансляциясын көргеннен кейін қызығушылық танытып, алғаш жаттығуларын өз ауласында бастаған. TikTok-та бастапқыда фитнес видеолар жүктесе де, күрделі воркаут элементтері арқылы танымалдыққа ие болды. Әсіресе, каблук пен көйлекпен турникке тартылған видеосы кеңінен таралып, оның аккаунтына мыңдаған жаңа жазылушы әкелді.
Армандағы жаттықтырушы
Айбат Кемер – волейболдан кәсіби жаттықтырушы. Өз парақшасында бұл спорт түрінің қыр-сырын үйретіп, техника мен тактикаларды талдайды. Сонымен қатар ойыншылардың физикалық көрсеткіштерін арттыруға арналған жаттығуларды бөліседі. Айбаттың контенті жаңадан бастағандарға да, кәсіби деңгейдегі спортшыларға да пайдалы. Жаттықтырушының шеберлігі мен харизмасы оны TikTok-тағы танымал спорт креаторына айналдырды.
Әркімге арналған фитнес-гид
«Алматылық фитоняшка» Анастасия Федотова фитнес пен дұрыс өмір салтын дәріптейтін видеолар түсіреді. Анастасия өз жазылушыларына үй жағдайында немесе жаттығу залында жасалатын түрлі жаттығулар мен фитнес лайфхактар ұсынады. Өз мысалында табандылық пен жүйелі дайындықтың нәтижесінде дене бітімін жақсартуға болатынын көрсетеді.
Еске сала кетейік, бұған дейін фитнес қандай аурулардан сақтайтыны туралы жазған едік.
