Үкімет жаңартылатын энергия көздері саласында 91 жобаны жүзеге асыруды көздеп отыр
Қазақстанда соңғы он жылда жаңартылатын энергия көздері нысандарының жалпы орнатылған қуаты 17 еседен астамға артып, 3082 МВт-қа жетті. Бұл туралы Энергетика министрлігі хабарлады.
Министрлік мәліметінше, бүгінгі таңда «жасыл» генерация елдегі жалпы электр энергиясы өндірісінің 6,43%-ын қамтамасыз етіп отыр. Бұл жетістіктер мен алдағы жоспарлар Power Central Asia + China өңірлік энергетикалық форумында таныстырылған.
Министрлік мұндай динамиканы энергетикалық жүйені қалыптастыруға бағытталған мемлекеттік саясаттың нақты нәтижесі ретінде сипаттайды. 2018 жылдан бастап іске қосылған ашық аукциондық механизм аясында 13 елден 260-қа жуық компания тартылған
«Инвесторлар үшін өңірдегі ең тартымды шарттар жасалған: 20 жылға дейінгі электр энергиясын сатып алу келісімшарттары, тарифтерді индекстеу, сондай-ақ инвестициялық преференциялар қарастырылған. Бұл саясаттың стратегиялық мақсаты – экологияны жақсарту ғана емес, сонымен бірге елдің энергетикалық тәуелсіздігін күшейту, заманауи технологияларды енгізу және жоғары білікті жаңа жұмыс орындарын құру», – делінген министрлік хабарламасында.
Жақын болашақтағы жоспарлар
– Ел бойынша 156 ЖЭК нысаны іске қосылған, оның ішінде 63 жел және 48 күн электр станциясы бар;
– 2025 жылы жалпы қуаты 455,5 МВт болатын тағы 9 нысан пайдалануға беріледі;
– Қытай, Франция, БАӘ және Ресейдің инвесторлары Қазақстанмен 5 ГВт-қа жуық жобаларды бірлесіп жүзеге асыруды жоспарлап отыр.
Үкіметтің мақсаты – елдің энергетикалық теңгеріміндегі ЖЭК үлесін 15%-ға дейін арттыру. Осы мақсатта 2030 жылға дейін жалпы қуаты 2258 МВт болатын 91 жаңа жобаны іске қосу көзделіп отыр. Сол арқылы ЖЭК-тің орнатылған жалпы қуаты 10 ГВт-қа жетеді деп күтілуде.
Бұған дейін, БҰҰ Қазақстандағы экожобалар үшін 280 млн доллар бөлетіні хабарланған.
