Астанадағы «Астана Аренада» өтетін Дженнифер Лопестің концерті кезінде қозғалыс уақытша шектеледі. Бұл туралы қала әкімдігі хабарлады.
Айта кетейік, Дженнифер Лопес 1 тамызда елордадағы «Астана Арена» стадионында Up All Night әлемдік туры аясында өнер көрсетеді. Қоғамдық қауіпсіздікті қамтамасыз ету, қонақтардың ыңғайлы келіп-кетуі мен қозғалысын ұйымдастыру мақсатында «Астана Арена» стадионы маңындағы «Алау» мұз сарайы мен «Сарыарқа» велотрегі жағынан автокөлік қозғалысы уақытша шектеледі.
Көлікті мына жерлерге қоюға болады:
- «Астана Арена» стадионы;
- «Алау» мұз сарайы;
- «Барыс Арена» мұз айдыны;
- «Сарыарқа» велотрегі;
- Ботаникалық бақ (Бұқар жырау және Орынбор көшелері жағынан);
- Керей мен Жәнібек хандар көшесі және басқа да тұрақ орындары.
Дженнифер Лопес концертіне келушілердің ыңғайлығы үшін қала бойынша бес орыннан «Астана Арена» стадионына және кері бағытта қатынайтын арнайы шаттл-автобустар қатынайды:
- Астана цирк тұрағы;
- «Әзірет Сұлтан» мешітінің тұрағы;
- «QAZAQSTAN» спорт кешенінің тұрағы;
- Тұран даңғылы жағынан Орталық саябақтың тұрағы;
- «Бас мешіт» тұрағы.
Шаттл-бастар концерт басталғанға дейін және аяқталғаннан кейін екі бағытта қатынайды. Кептелістер мен тұрақ мәселесіне тап болмас үшін фестиваль көрермендері қоғамдық көлікпен қатынағаны жөн.
