Түркияның «Фенербахче» футбол клубы бас бапкер Жозе Моуриньюмен ресми түрде қош айтысты. Бұл шешім команда Чемпиондар лигасының іріктеу кезеңінен өте алмағаннан кейін қабылданды.
Чемпиондар лигасындағы сәтсіздік
Ыстанбұлдық клуб плей-оффта Португалияның «Бенфикасына» жол берді. Алғашқы ойында тең есеп (0:0) тіркелсе, қарымта кездесуде «Фенербахче» өз алаңында 0:1 есебімен жеңіліп қалды. Осы нәтижеден кейін команда Еуропаның басты клубтық турнирінің топтық кезеңіне шыға алмады. Бұл жайт португалиялық маманның тағдырын шешті.
«Фенербахче» қысқаша ресми мәлімдеме жасап, Моуриньюге клубқа сіңірген еңбегі үшін алғыс айтып, алдағы бапкерлік жолына табыс тіледі. Жаңа бас жаттықтырушының есімі әзірге жарияланған жоқ. Түрік басылымдарының хабарлауынша, клуб қазір бірнеше кандидатпен келіссөз жүргізіп жатыр.
Моуриньюдің көрсеткіші
Жозе Моуринью «Фенербахчеге» 2024 жылдың жазында келген болатын. Бір маусымда клубты Суперлигада екінші орынға жеткізді, бірақ бірде-бір трофей иелене алмады.
Жалпы, оның жетекшілігімен команда 62 ресми матч өткізді:
- 37 жеңіс,
- 14 тең ойын,
- 11 жеңіліс.
Моуринью Түркияға келген ең атақты бапкерлердің бірі болды. Португалиялық бапкердің есімі әлем футболында танымал болғанымен күткендей нәтиже болмады.
61 жастағы португалиялық маман — футбол тарихындағы ең титулды бапкерлердің бірі. Ол Чемпиондар лигасын «Порту» мен «Интермен» жеңіп алған. Сондай-ақ «Челси», «Реал Мадрид», «Манчестер Юнайтед» және «Ромада» айтарлықтай табыстарға жеткен. Дегенмен, оның Түркиядағы кезеңі қысқа әрі нәтижесіз аяқталды.
Айта кетейік, алматылық «Қайрат» тарихында алғаш рет Чемпиондар лигасына өтіп, мадридтік «Реал Мадрид» командасына қайрсы ойнайды.
