Таяу күндері Қазақстан аумағына Атлантикалық циклон және онымен байланысты атмосфералық өзгерістер келеді. «Қазгидромет» синоптиктері елге алғашқы минус 20 градусқа дейінгі аяз келетінін ескертеді.
Циклон Қазақстанға қар, тұман және боран әкеледі
Республика бойынша жаңбыр және қар жауып, кей жерлерде тұман, көктайғақ, қатты жел мен боран соғады. Мұндай құбылмалы ауа райы әсіресе елдің шығысында, солтүстігінде және орталығында күтіледі.
«Қазақстан аумағының басым бөлігі Атлантикалық циклон шұңқырының және онымен байланысты атмосфералық фронтальды бөлімдердің ықпалында болады, осыған байланысты жауын-шашын күтіледі», – делінген қысқа мерзімді болжамда.
13 қарашада шығыс және оңтүстік-шығыс аймақтарда қатты жауын-шашын болады. Құрғақ ауа-райы елдің оңтүстігі мен оңтүстік-батысында ғана сақталады.
Елдің шығысында күн күрт бұзылады:
- Солтүстік: түнде -5…-12 °C, күндіз -6 0 °C
- Солтүстік-батыс: түнде -2…-10 °C, күндіз -5 0 °C
- Орталығы: түнде -3…-13 °C, күндіз -6… + 3 °C
- Шығыс: түнде -8…-20 °C, күндіз -10 0 °C
- Қалған аймақтар: айтарлықтай өзгерістер жоқ.
Синоптиктердің айтуынша, алдағы күндері ауа-райы жүргізушілер мен жаяу жүргіншілер үшін қауіпті болуы мүмкін. Жүргізушілерге көктайғақ пен көру қабілетінің нашарлауына байланысты жолға ерекше назар аудару ұсынылады.
«Қазгидрометтің» маусымдық болжамына сәйкес, елдегі алғашқы аяз қараша айының соңында — солтүстікте, орталықта және шығыста -20 °C дейін күтілді.
