Жамбыл облысы Байзақ ауданының Мырзатай ауылында Мырзатай орта мектебінің 12 оқушысы уланып қалды.
Бұл туралы облыстың санитарлық-эпидемиологиялық бақылау департаменті хабарлады.
Департамент ақпаратына қарағанда, оқушылар жедел жәрдеммен Байзақ аудандық орталық ауруханасына жіберілді. Ауруханаға түскен кезіндегі шағымдары: әлсіздік, жүрек айну, бас айналу.
«Дәрігердің қарауынан кейін, барлық 12 науқас жағдайына қарай 11.11.2025 ж. Сағат 16.00-де үйге шығарылды. Қазіргі уақытта балалардың жағдайы бірқалыпты. Медициналық бақылауда», – деп хабарлады Жамбыл облысының санитарлық-эпидемиологиялық бақылау департаменті басшысының орынбасары Салтанат Әлібаева.
Оның сөзіне қарағанда, барлық тиісті зертханалық зерттеу жұмыстары жүргізілген.
«Бүгінгі күнге жаңа тіркелген жағдайлар жоқ. Санитариялық-эпидемиологиялық тергеп-тексеру жалғасып жатыр», – дейді Салтанат Әлібаева.
Айта кететін жайт, Жаңаөзенде 100 бүлдіршін балабақша тамағынан уланған болатын.
