«Жолаушылар тасымалы» АҚ паркі Петропавл зауытында шығарылған 20 жаңа жолаушылар вагонымен толықты. Заманауи вагондар бүгіннен бастап №301/302 «Алматы – Новосибирск»бағыты бойынша қатынай бастады. Жаңа вагондар тіркелген алғашқы пойыз бүгін Алматы вокзалынан сапарға аттанды.
«Мемлекет басшысының тапсырмасына сәйкес, жолаушылар вагоны паркін жаңарту және жаңғырту жұмыстары қарқынды жүріп жатыр. Бұл – біздің компанияның стратегиялық басымдығы. Бүгін «Алматы – Новосибирск» бағытына жаңартылған құрам шықты. Бұл өзгерістер халықаралық көлік қатынасын дамытудағы маңызды кезең болмақ», — деп атап өтті жаңа вагондардың таныстырылымында «Жолаушылар тасымалы» АҚ Бас директоры Дияр Нүсіпқожанов.
Пойыздың әр құрамы 10 вагоннан тұрады: 5 купе және 5 плацкарт. Олар бір бағытта 400-ден астам жолаушы тасымалдауға есептелген. Пойыз жұп күндері қатынайды: Алматы станциясынан сағат 14:50-де шығып, Новосибирск станциясына 08:58-де (РФ уақытымен) жетеді. Кері бағытта Новосибирскіден 14:55-те шығып, Алматыға 07:45-те (ҚР уақытымен) келеді.
«Жолаушылар тасымалы» АҚ мәліметінше, вагондар дизайн, қауіпсіздік, сенімділік және жайлылық жөніндегі заманауи талаптарға сай жасалған. Купелерде эргономикалық жатын орындар, жеке жарық шамдары, USB-порттар және электр розеткалары орнатылған. Мүмкіндігі шектеулі жолаушыларға арнайы купелер мен арбаға арналған орындар, сондай-ақ жолсерікті шақыру түймесі қарастырылған. Жаңа вагондар қызмет ету мерзісі 40 жыл.
Еске салайық, «Жолаушылар тасымалы» OneWeb және Starlink– пен бірлесіп пойыздарға спутниктік интернет орнатуды бастады. Қазірдің өзінде жоғары жылдамдықты Wi-Fi «Астана – Алматы», «Астана – Өскемен» және «Астана – Бурабай» бағыттарында бар.
