Қазақстанда шағын бизнесті қолдау мақсатында кәсіпкерлерге POS-терминалдар тегін беріледі. Мемлекеттік кірістер комитетінің хабарлауынша, бұл қадам бизнестің шығындарын азайтып, сауда үдерісін автоматтандыруға бағытталған.
Кәсіпкерлерге стационарлық терминалдар да, смартфонға орнатылатын мобильді қосымшалар да қолжетімді болады.
Қазір Kaspi Bank пен Қазақстан Халық Банкінің (Halyk Bank) POS-терминалдары толыққанды бақылау-касса машинасы (БКМ) ретінде жұмыс істейді. Олар штрих-кодтарды сканерлеу функциясымен жабдықталған. Жақын арада мұндай мүмкіндіктер Freedom Bank Kazakhstan және Банк ЦентрКредит терминалдарында да іске қосылмақ.
2026 жылдан бастап не өзгереді
2026 жылғы 1 қаңтардан бастап Салық кодексіне енгізілген жаңа талаптар күшіне енеді. Соған сәйкес:
- Чекте тауар атауы міндетті: Енді чекте тауардың немесе қызметтің атауы Ұлттық тауарлар каталогына (ҰТК) сәйкес нақты көрсетілуі тиіс.
- Чекті жоюға тыйым салынады: Чекті жай ғана өшіріп тастау мүмкін болмайды. Кез келген түзету тек «қайтару чегін» ресімдеу арқылы жасалады.
- Геолокация: Фискалдық деректер операторлары (ФДО) кассалық аппараттың қай жерде тұрғаны туралы деректерді МКК-ге беріп отырады.
Кәсіпкерлер не істеуі керек
Жаңа талаптарға сай болу үшін кәсіпкерлерге БКМ құрылғыларын жаңарту қажет:
- Бағдарламалық кассалар: Олар 2.0.3 хаттамасына автоматты түрде жаңартылған.
- Стационарлық кассалар (Меркурий, Миника, Порт т.б.): Аппараттардың иелері техникалық қызмет көрсету орталықтарына барып, қолмен жаңартуы тиіс.
- Сканерлеу: Тауар атауын чекте көрсету үшін POS-терминалдағы сканерді, телефон камерасын немесе кассаға жалғанған жеке сканерді пайдалану міндетті.
