«Артемида-2»: Айды айналып келген астронавттар Тынық мұхитына қонды

NASA-ның төрт астронавты бар «Орион» ғарыш кемесі Калифорния жағалауындағы Тынық мұхитына сәтті қонды. Осылайша, жарты ғасырдан астам уақыттан бері алғаш рет адамдардың Айға ұшуын көздеген «Артемида-2» экспедициясы аяқталды.

Қону барысы

Ғарыш кемесі жоспар бойынша АҚШ-тың батыс жағалауындағы жергілікті уақытпен сағат 17:08-де (Гринвич бойынша 11 сәуір, 00:08) су бетіне түсті.

NASA өкілдері «Орионның» қонуын «оқулықтағыдай мінсіз» деп сипаттады.

Алайда, қонғаннан кейін экипаж бен құтқару тобы арасында спутниктік телефон байланысында аздаған қиындықтар туындады. Осыған байланысты астронавтар өз әрекеттерін Хьюстондағы ұшуды басқару орталығы арқылы үйлестіруге мәжбүр болды.

«Артемида-2» 1 сәуірде ұшырылды. Бұл – аса ауыр Space Launch System зымыранының екінші ұшырылымы және Orion кемесінің алғашқы пилотталған сапары болды.

Аталған миссия бірнеше тарихи жетістікпен ерекшеленді. Адамзат 50 жылдан астам уақыттан кейін алғаш рет Айға қайта ұшты. Соңғы мұндай сапар Apollo 17 миссиясы аясында 1972 жылы жүзеге асқан болатын.

Виктор Гловер Жер орбитасынан тыс аймаққа шыққан алғашқы қара нәсілді астронавт атанды. Кристина Кох – мұндай деңгейге жеткен алғашқы әйел, ал Джереми Хансен – алғашқы америкалық емес астронавт болды. Бұған дейін Айға ұшқан барлық ғарышкерлер тек америкалықтар еді.

Миссия барысында «еркін қайту» траекториясы қолданылды – кеме Айды бір айналып өтіп, Жерге қайта оралды. Бұл әдіс Apollo 13 миссиясында да қолданылған, бірақ ол кезде бұл төтенше жағдайға байланысты жүзеге асқан.

Айта кетейік, «Аполлон-13» миссиясы кезінде кеме Жерден 400 171 шақырым қашықтыққа дейін алыстаған еді. Ал «Артемида-2» бұл рекордты жаңартып, 6 сәуірде 406 771 шақырымға дейін жетті.