Қазақстандағы автокөлік иелері негізгі қызметтерді eGov.kz порталы және eGov Mobile мобильді қосымшасы арқылы онлайн ресімдеуге мүмкіндік алды. Бұл туралы «ҰАТ» АҚ баспасөз қызметінен хабарлады. Қазіргі таңда онлайн қызметтер қатарына автокөлікті бастапқы тіркеу, техникалық паспортты және нөмірлік белгілерді ауыстыру, сондай-ақ, жеке тұлғалар арасында сатып алу-сатуды ресімдеу жатады.
Автокөлікті бастапқы тіркеу
Енді Қазақстанда ресми дилерден сатып алынған автокөлікті бастапқы тіркеуді толығымен онлайн ресімдеуге болады. Ол үшін автосалонда көлік таңдап, сатып алу-сату шартын жасасу жеткілікті. Әрі қарай ресімдеу қашықтан жүргізіледі:
- сатып алушы eGov.kz немесе eGov Mobile арқылы жеке кабинетте хабарлама алады;
- көлік туралы деректерді тексереді;
- қол жетімді нұсқалардың ішінен мемлекеттік нөмірді (GRNZ) таңдайды;
- ұсынылған әдістердің бірімен өтінішке қол қояды.
Осылайша, автокөлікті тіркеудің негізгі кезеңдерін ХҚКО-ға бармай-ақ жасайды.
Техникалық паспортты және мемлекеттік нөмірді ауыстыру
Сондай-ақ, онлайн-форматта техникалық паспортты ауыстыру және иесін ауыстырмай МТНБ қызметі іске қосылды. Жүйе машинаның айыппұлын автоматты түрде тексереді, тіркеу шамамен бір сағатты алады.
Азаматтар арасында сатып алу-сату
eGov.kz және eGov Mobile арқылы көлікті сатып алу-сату мәмілелерін электронды форматта рәсімдей алады. Бұрын бұл мүмкіндік тек жеке банктік қызметтер арқылы қол жетімді болды. Ал қазір процесс Мемлекеттік онлайн қызметтерге толығымен біріктірілген.
