Қырғызстанның Ұлттық қауіпсіздік мемлекеттік комитетінің (МҰҚК) бұрынғы басшысы Қамшыбек Тәшиев Ораза айт мерекесінде көпшілікті таңғалдырды. Лауазымынан босатылғаннан кейінгі бұл алғашқы мәлімдемесінде елді бірлікке шақырып, өзіне қатысты айтылған сын-пікірлерге жауап берді.
«Алла ризалығы үшін кешірдім»
Әлеуметтік желілерде кең таралған видеода Тәшиев әрбір отбасыға амандық пен береке тіледі. Сондай-ақ, қасиетті күндерде кешірімді болудың маңыздылығын атап өтті:
«Егер байқаусызда қателік жіберіп, біреудің көңіліне тиген болсам, кешірім сұраймын. Қасиетті Ораза айында мен туралы түрлі қауесет таратып, қара күйе жаққандардың барлығын Алла ризалығы үшін кешірдім. Алдағы уақытта олар шындыққа жанаспайтын ақпарат таратпайды деп үміттенемін», – деді экс-шенеунік.
Саяси ахуал: Тәшиевтің қызметтен кету себебі
Еске сала кетейік, бес жыл бойы Қырғызстанның қауіпсіздік саласын басқарған Қамшыбек Тәшиев жақында ғана қызметінен босатылған болатын.
Бұл шешімге қатысты Садыр Жапаров ресми мәлімдеме жасаған еді. Қырғызстан президентінің айтуынша, Тәшиевтің кейбір жақтастарының әрекеті ел ішіне жік түсіріп, саяси тұрақсыздыққа қауіп төндіре бастаған.
