Ресей Думасы өзге елдерге әскер кіргізуге мүмкіндік беретін заң қабылдады

Ресейдің Мемлекеттік Думасы бірінші оқылымда «Азаматтық туралы» және «Қорғаныс туралы» заңдарға түзетулер енгізу жобасын бірауыздан мақұлдады. Ол Ресей президентіне халықаралық, ұлттық сот шешімімен ұсталған ресейліктерді «қорғау» үшін өзге елдерге әскер кіргізуге мүмкіндік береді деп жазады ВВС. Бұл құжат ресми түрде шетелде қудаланған ресейліктерді қорғауға бағытталғанымен, сарапшылар оны АҚШ-тың «Гаагаға басып кіру туралы заңының» баламасы ретінде сипаттайды.

Ресей Қорғаныс министрінің орынбасары Анна Цивилеваның айтуынша, құжат президенттің шешімімен ресейліктерді шетелдегі қылмыстық және өзге де қудалаулардан қорғау мақсатында әзірленген. Мемлекеттік Дума спикері Вячеслав Володин бұл қадамды «дос емес мемлекеттердің әрекетінен азаматтардың құқықтары мен бостандықтарын қорғауды күшейту» деп түсіндірді.

Әскери күш қолдану мүмкіндігі

Заңға енгізілетін негізгі өзгерістер Ресей президентіне айрықша өкілеттіктер береді. «Азаматтық туралы» заңда биліктің шетелде тұтқындалған немесе қудалауға ұшыраған азаматтарды қорғау үшін «қажетті шаралар» қабылдау міндеті бекітіледі. Ал «Қорғаныс туралы» заңдағы түзетулер президентке Қарулы Күштерді «өз мақсатынан тыс» қолдануға, атап айтқанда, ресейліктерді қорғау үшін шетелге әскер жіберуге құқық береді.

Құжат бойынша, мұндай «күшпен қорғау» шаралары кез келген тұтқынға емес, тек халықаралық соттар немесе өзге мемлекеттер өкілеттік берген ұлттық соттар тарапынан айыпталған тұлғаларға қатысты қолданылады.

Заң жобасында «өкілеттік берілген сот» немесе «қажетті шаралар» деген ұғымдардың нақты анықтамасы берілмеген. Кельн университетінің халықаралық құқық маманы Глеб Богуш бұл тұжырымдардың өте бұлыңғыр екенін айтады. Мамандардың пікірінше, бұл анықтамалардың нақты болмауы Ресейге кез келген мемлекетке қарсы әскери күш қолдану үшін заңдық сылтау жасап беруі мүмкін.

2022 жылы Ресей Украинаға қарсы соғыс ашқанда, «сондағы»қысым көрген ресейліктерді қорғаймыз» дегенді желеу еткен. Қазір соғыс төртінші жылға созылды. Жақында Пасха мерекесіне байланысты екі тарап уақытша бітім жариялады.