Үкімет шетел азаматы үшін елге кіру, азаматтық алу тәртібін жеңілдетті

Қазақ үкіметі шетел азаматтарының елге кіру, виза рәсімдеу және рұқсат құжат, азаматтық алу тәртіптерін жеңілдетіп жатыр. Бұл туралы Kursiv.Media Еңбек министрлігінің мәліметіне сүйене отырып хабарлайды.

Жеңілдікті кімдер алады

Министрлік инвесторлар, бизнес өкілдері және өзге де шетел азаматтары үшін елге кіру тәртібін жеңілдеткенін мәлімдеді.

«Жеңілдетілген және инвестициялық режимдер аясында түрлі преференциялардың кең ауқымы ұсынылған. Бұл дегеніміз – инвесторлар мен кәсіпкерлер арнайы визалық режимдерді, өтінімдерді жедел қарау рәсімдерін, сондай-ақ инвестициялық жобаларды сүйемелдеу тетіктерін пайдалана алады деген сөз», – деп түсіндірді министрлік.

Бұған қоса, жеңілдік сұранысқа ие мамандықтар бойынша Қазақстанда жұмыс істеу үшін келетін шетел азаматтарына, мемлекеттік органдардың қолдаухаты болған жағдайда экономикалық және әлеуметтік жобаларға қатысушыларға да беріледі.

Министрлік ІТ саласы мамандары қажет екенін ерекше атап өтті. Сонымен бірге денсаулық сақтау, креативті индустрия, жаратылыстану ғылымдары, инженерлік және өңдеу салаларында да сұраныс жоғары.

Төрт елдің азаматтары жұмысқа тұра алады

Еуразиялық экономикалық одаққа (Армения, Беларусь, Қырғызстан және Ресей) мүше мемлекеттердің азаматтары үшін де қолайлы жағдай жасалған. Олар рұқсат құжаттарын алмай-ақ еркін жұмысқа орналасу құқығына ие. Қазақстан азаматтары да дәл осындай тәртіппен одақтағы елдерде жұмыс істеп жүр.

Үкімет мәліметінше, 2026 жылы сұранысқа ие мамандықтар бойынша шетелден жұмыс күшін тартуға 5,1 мың рұқсат берілді. Бұған қоса еңбек иммигранттарына шамамен 75 мың рұқсат рәсімделді.

2026 жылға арналған шетелдік жұмыс күшін тарту квотасы – 23,6 мың, ал еңбек иммигранттарын тарту квотасы – 221,8 мың адам.

Азаматтық алу

Еңбек министрлігі болашағын Қазақстанмен байланыстыратын, яғни азаматтық алуға ниетті шетел азаматтарын қабылдау сапасын арттыруға бағытталған көші-қон саясатын өзгертті. Осыған байланысты тұрақты тұруға рұқсат алу тетігінің заманауи цифрлық тәсілдер мен ашықтық қағидаттарына негізделген жаңартылған тетігі енгізіліп жатыр.

Жаңа тәртіп үміткерлерді кезең-кезеңімен бағалауды көздейді:

• мемлекеттік тілді базалық деңгейде меңгеруін тексеру;
• сауалнамалық деректерді талдау;
• цифрлық скоринг;
• уәкілетті мемлекеттік органдар тарапынан тексерулер;
• қорытынды сұхбат.

Үкіметтің мәлімдеуінше, мұндай тәртіп Қазақстанды ұзақ мерзімге қоныстанып, қоғам өміріне белсенді араласатын ел ретінде таңдайтын азаматтарға бағытталған.