Иран АҚШ-пен келіссөздерге қатысу туралы шешім қабылдаған жоқ

Иран Сыртқы істер министрлігі Пәкістанның делдалдығымен өткізу жоспарланған Америка Құрама Штаттарымен келіссөздердің келесі кезеңіне қатысу туралы әзірге шешім қабылдамағанын мәлімдеді. Бұл туралы ведомствоның ресми өкілі Эсмаил Багаи дүйсенбі күнгі апталық брифингте хабарлаған.

Оның айтуынша, Тегеранның «келесі кезеңдегі келіссөздер бойынша жоспары жоқ», ал тиісті шешім жалғасып жатқан эскалация салдарынан әлі әзірленбеген. Ол Иран өз ұстанымы туралы делдал ретінде Пәкістан тарапына хабарлағанын атап өтті.

Иран СІМ АҚШ-тың әрекеттері дипломатияға деген шынайы қызығушылықтың жоқтығын көрсететінін мәлімдеді. Атап айтқанда, Тегеран американдық күштердің ирандық жүк кемесін басып алуын, ирандық порттарға теңіз блокадасын енгізуін, сондай-ақ 8 сәуірден бері қолданыстағы атысты тоқтату режимін бұзуын алға тартты.

«Америка Құрама Штаттары келіссөздерге бейілділігін мәлімдегенімен, олардың іс-әрекеттері дипломатиялық процесті ілгерілетудегі салмақтылығын көрсетпейді», – деп атап өтті Багаи.

Ол тараптар арасындағы негізгі келіспеушіліктердің, соның ішінде жоғары байытылған уран қоры туралы мәселенің сақталып отырғанын айтып, оны Америка Құрама Штаттарына беру мәселесі «ешқашан талқыланбағанын және қарастырылмайтынын» баса айтты.

Тегеран, сондай-ақ, АҚШ пен Израиль тарапынан жаңа шабуылдар жасалған жағдайда, Иран қарулы күштері «тиісті жауап беретінін» ескертті.

Осыған дейін белгілі болған ақпаратқа сүйенсек, Исламабадтағы келіссөздерде АҚШ делегациясын тағы да вице-президент Джей Ди Вэнс бастап барады. Сондай-ақ, консультацияларға Трамптың арнайы өкілдері Стив Уиткофф пен Джаред Кушнер қатысады, олар бір апта бұрын Вэнспен бірге алғашқы раундқа қатысқан еді.
Иран келіссөздерге қатысты әзірге түпкілікті шешім қабылдамағаны хабарланды.