Қазақстанда салынатын екінші атом электр станциясы «Мойынқұм» деп аталуы мүмкін. Бұл туралы Ақорда кулуарында Атом энергиясы агенттігінің төрағасы Алмасадам Сәтқалиев айтты.
«Әзірге екінші АЭС-ті жұмыс барысында «Мойынқұм» деп атадық. Бұл станция да қуаттылығы 1200 МВт құрайтын екі блоктан тұрады. Серіктестермен болашақ вендорды анықтауға қатысты келіссөз жүргізіп жатырмыз», – деді агенттік төрағасы.
Екінші АЭС-тің қайда салынатыны әлі нақтыланбаған. Әзірге үш аймақ қарастырылып жатыр.
Қазақстанда 2050 жылға дейін кемі үш АЭС салынбақ. Жақында Қасым-Жомарт Тоқаев атом энергетикасын дамыту жөніндегі стратегияға қол қойды.
Қазақстандағы алғашқы АЭС Үлкен ауылы маңында салынады. Ол «Балқаш» деп аталатын болды. АЭС құрылысы 10-12 жылға созылуы мүмкін. Қазір Алматы облысындағы Үлкен ауылының маңында инженерлік ізденіс жұмысы жүріп жатыр.
