Теміртауда балаларды ұрған видеодан кейін тәрбиешіге қатысты тексеру басталды

Теміртауда балабақша тәрбиешісі балаға күш көрсеткен, деп хабарлады қалалық білім бөлімі. «Айгөлек» балабақшасындағы бейнебақылау камерасына түскен кадрларды мектепке дейінгі мекеме тәрбиеленушілерінің бірінің анасы жариялады.

Бейнежазбада балалардың екі ересек адамның бақылауымен тапсырма орындап жатқаны көрінеді. Сол сәтте тәрбиешілердің бірі дәптерді нұсқап, баланы қолынан және иығынан бірнеше рет ұрады.

Баланың анасының айтуынша, болған жағдай оған қатты соққы болған.

«Балабақшада баламмен болған жағдай мені қатты есеңгіретті – тәрбиеші балама қол көтерді. Ата-ана ретінде мен үшін бұл жол беруге болмайтын, қорқынышты жағдай. Балалар қорқыныш емес, қауіпсіздік, қамқорлық пен қолдауды сезінуі керек. Мен бұл жағдайдың көпшілікке жария болғанын және мұндай оқиғалар назардан тыс қалмауын қалаймын», – деп жазды баланың анасы.

Қалалық білім бөлімі аталған факті бойынша комиссия құрылғанын хабарлады.

«Болған оқиғаның мән-жайын жан-жақты, объективті және толық анықтау мақсатында қызметтік тергеу жүргізілуде. Тергеу кезеңінде қажетті ұйымдастырушылық шаралар қабылданды. Тексеру қорытындысы бойынша қолданыстағы заңнамаға сәйкес тиісті шаралар қолданылады», – деп мәлімдеді ведомстводан.

Павлодарда әлеуметтік желідегі жан түршігерлік видеодан кейін 33 жастағы тәрбиеші 4 жарым жылға бас бостандығынан айырылған еді.