Астана LRT-ға алынған 19 пойыздың 15-і ғана тұрақты қатынайды

Астана LRT жүйесіне 19 пойыз сатып алынды, олардың тек 15-і тұрақты қатынайды. Қалғандары ақау болған жағдайда пайдаланылатын қосалқы құрам ретінде сақталады. Бұл туралы City Transportation Systems компаниясы Tengrinews басылымына хабарлады.

CTS көлік компаниясының мәліметінше, LRT желісінің кейбір пойыздары техникалық ақау туындаған жағдайда резервте тұрады. Пойыздар толықтай жүргізушісіз, автоматты түрде басқарылады. LRT желісі жол қозғалысымен қиылыспайды. Құрамдардың жылдамдығы сағатына 80 шақырымға дейін жетеді.

Желі тәулігіне 25-тен 45 мыңға дейін жолаушы тасымалдай алады. Бір пойыз 600 жолаушыға арналған. Пойыздардың ішінде бейнебақылау камералары орнатылған, оларды бақылау орталықтан жүзеге асырылады. Ақау анықталған жағдайда пойыздар автоматты түрде тоқтайды.

LRT қозғалысының кестесі әзірге бекітілген жоқ. Құрамдардың жүру жиілігі мен аялдау уақыты қазіргі уақытта тестілеу барысында анықталуда. Желі автобус маршруттарымен біріктіріліп, жолаушыларды станцияларға жеткізу үшін қосымша автобустар қарастырылған.