АҚШ Мемлекеттік хатшысы Марко Рубио Иранға қарсы кезекті әскери операцияның аяқталғанын хабарлады. Саясаткер бұл туралы Ақ үйде өткен баспасөз мәслихатында айтты.
Рубио АҚШ-тың Иранға қарсы «Эпикалық қаһар» операциясының аяқталғанын мәлімдеді.
«Эпикалық қаһар» операциясы аяқталды, біз Конгреске осы кезеңді тәмамдағанымызды хабарладық. Енді біз «Азаттық» жобасы операциясына кірістік», – деп түсіндірді Рубио.
Мемлекеттік хатшының айтуынша, қазіргі уақытта Ормұз бұғазы арқылы кеме қатынасын қайта жандандыру – АҚШ-тың басты міндеті. Сондай-ақ Рубио «Азаттық» жобасы тек қорғаныс сипатында құрылғанын айтты. Яғни, енді АҚШ тек шабуыл жасалған жағдайда ғана оқ атады.
Айта кетейік, 1 мамырда АҚШ Президенті Дональд Трамп Конгреске хат жолдап, онда Иранға қарсы соғыс қимылдарының аяқталғанын мәлімдеген.
Дүйсенбі күні Трамп Ормұз бұғазында бөгеліп қалған кемелерді босату бойынша «Азаттық» жобасы операциясының басталғанын жариялады.
