БҰҰ мәліметінше, сәуір айында әлемдік азық-түлік бағасы соңғы үш жылдағы ең жоғары деңгейге көтерілді. Бұл өсімге негізінен Ирандағы соғыс салдарынан энергия ресурстарының қымбаттауы себеп болған. Жанар-жағармай бағасы өскендіктен, өсімдік майларынан жасалатын биоотынға сұраныс артып, соның әсерінен күнбағыс, соя және пальма майларының құны күрт жоғарылады.
ФАО сарапшыларының айтуынша, азық-түлік жүйесі соғыс тудырған қиындықтарға қарамастан төзімділік танытып отыр. Мысалы, астық бағасы айтарлықтай қатты өскен жоқ, өйткені өткен маусымдардан қалған қор жеткілікті. Дегенмен, жалпы баға индексі наурыз айымен салыстырғанда 1,6%-ға артып, 2023 жылдың ақпанынан бергі ең жоғары көрсеткішке жетті.
Сонымен қатар, БҰҰ 2025 жылға арналған болжамын жаңартып, биыл әлемде рекордтық көлемде – 3 млрд тоннадан астам астық жиналады деп күтіп отыр. Бұл өткен жылмен салыстырғанда 6%-ға көп және болашақта нарықтағы жағдайды тұрақтандыруға көмектесуі мүмкін.
Айта кетейік, 2026 жылғы сәуір айында Қазақстандағы инфляция деңгейі жылдық мәнде 10,6 пайызды құрады.
