Павлодарда 2 жастағы 16 сәбиді азаптаған балабақша қызметкері сотталды

Павлодарда сот балабақша тәрбиешісіне қатысты үкім шығарды. Ол 2-2,5 жастағы 16 баланы азаптағаны үшін кінәлі деп танылды.

Павлодар облысының прокуратурасының ақпаратына қарағанда, айыптау тарапы сотталушының балаларға жүйелі түрде зорлық-зомбылық көрсеткенін анықтаған. Оларды ұрып-соғып, шаштарынан тартып, лақтырып, дене және психикалық зардап келтірген.

«Тәрбиешінің кінәсі мемлекеттік айыптауды қолдаған прокурордың белсенді ұстанымының арқасында дәлелденді. Ол даусыз дәлелдер ұсынып, ауырлататын мән-жайларды алға тартып, неғұрлым ауыр айып тақты», – делінген прокуратура хабарламасында.

2026 жылғы 17 сәуірде сот оған 4 жыл 6 ай мерзімге бас бостандығынан айыру жазасын тағайындады. Жазаны өтеуді кейінге қалдырып, 3 жыл мерзімге педагогикалық қызметпен айналысу құқығынан айырды.

Үкім заңды күшіне енген жоқ.

Айта кететін жайт, Теміртауда балаларды ұрғаны түсіп қалған видеодан кейін тәрбиешіге қатысты тексеру басталды.