«Реал Мадрид» ойыншылары төбелес шығарып, Вальверде бас жарақатын алды

Әлемге танымал «Реал Мадрид» футбол клубының ойыншылары Федерико Вальверде мен Орельен Тчуамени жаттығу барысында төбелес шығарды.

Уругвайлық футболшы жанжалдың болғанын растап, оған маусым соңындағы шаршау мен сәтсіздіктер себеп болғанын айтты.

«Мұндай жағдайлар киіну бөлмесінде болып тұрады және әдетте іштей шешіледі. Бірақ биылғы титулсыз маусымда «Реалға» деген назар ерекше, сондықтан бұл оқиға тым асыра сілтеп көрсетілді. Біз сөзге келіп қалдық, сол сәтте мен абайсызда үстелге соғылып, маңдайымды кесіп алдым. Мені ешкім ұрған жоқ, мен де ешкімді ұрған жоқпын», – деді Вальверде.

Денсаулық жағдайы және жаза

Клуб бұл оқиғаға байланысты тәртіптік іс қозғады. Ресми мәлімет бойынша:

Федерико Вальвердеге бас сүйек-ми жарақаты диагнозы қойылған. Ол медициналық хаттамаға сәйкес 10 күннен 14 күнге дейін демалуы тиіс. Футболшы команданың алдағы матчтарына қатыса алмайды.

Вальверде Чемпиондар лигасынан шығып қалу және маусымның сәтсіз аяқталуы жанына батқанын, ал бұл «түкке тұрғысыз сөзге келу» оның имиджіне нұқсан келтіргеніне өкінетінін жеткізді.