Қырғызстан ҰҚМК бұрынғы басшысына қатысты іс құпия болып, сотқа жолданды

Бас прокуратура ҰҚМК-нің бұрынғы басшысы Қамшыбек Ташиевке қатысты қылмыстық іс бойынша айыптау актісін бекітті. Бұл туралы әлеуметтік желідегі парақшасында адвокат Икрамидин Айткулов хабарлады.

Заңгердің айтуынша, қылмыстық іске құпиялылық грифі қойылған, демек сот отырыстары жабық режимде өтеді, ал тергеу мен сот деректерін жария етуге тыйым салынады.

«Бүгін Қырғыз Республикасының Бас прокуратурасы Қамшыбек Қыдыршаұлы Ташиевке қатысты билікті күшпен басып алуға дайындалу және өзінің жауапты қызметтік жағдайын асыра пайдалану айыбы бойынша қылмыстық істің айыптау актісін бекітті. Қылмыстық іс мәні бойынша қаралу үшін Бішкек қаласының Бірінші май аудандық сотына берілді. Онымен бірге іс бойынша тағы жеті айыпталушы өтуде. Қылмыстық іске құпиялылық грифі қойылған. Бұл барлық сот отырыстары жабық өтетінін, ешкімнің тергеу және сот деректерін жария етуге құқығы жоқ екенін білдіреді», – деп жазды заңгер.

Еске сала кетейік, Қамшыбек Ташиев билікті күшпен басып алуға дайындалу және қызметтік өкілеттігін асыра пайдалану баптары бойынша айыпталуда.

Адвокат қылмыстық істің мән-жайы бойынша қаралу үшін Бішкек қаласының Бірінші май аудандық сотына берілгенін мәлімдеді. ҰҚМК-нің бұрынғы басшысымен бірге бұл іс бойынша тағы жеті айыпталушы өтуде.