Қазақстандықтарға әскери қақтығыс аймағына баруға заң жүзінде тыйым салынуы мүмкін

Қазақстанда әскери қақтығыс аймақтарына баруды уақытша шектеу мүмкіндігін заңнамалық түрде бекіту көзделіп отыр, деп хабарлады премьер-министр Олжас Бектенов депутаттық сауалға берген жауабында.

Ол Таяу Шығыс елдерінде жағдай ушыққан кезеңде республиканың 66 эвакуациялық рейс ұйымдастырғанын еске салды.

«Оның ішінде 27 ұшудың шығыны республикалық бюджет есебінен төленді. Қалған 39 коммерциялық рейстің билеттерін азаматтар өздері сатып алды. Оларды өзге елдердің әуе компаниялары да орындағанын ескерсек, эвакуацияға кеткен шығынның жалпы сомасын анықтау мүмкін емес», – делінген құжатта.

Алайда, Бектеновтің айтуынша, эвакуация кезінде кейбір қазақстандықтардың қақтығыс аймақтарына баруды жалғастыруына байланысты қосымша жүктеме пайда болған. 191 азамат Алматыдан Дубай мен Шарджаға ұшып кеткен. Сондықтан мемлекеттік органдар мұндай аймақтарға баруды уақытша шектеудің заңнамалық тетіктерін әзірлейтін болады.

Сондай-ақ Қазақстан төтенше жағдайларға арналған арнайы әуе кемелерін сатып алу мүмкіндігін қарастыруда.

«Осыған байланысты дағдарыстық жағдайларда ұлттық және отандық әуе тасымалдаушыларын жедел жұмылдыру тәртібін жетілдіру, сондай-ақ төтенше қажеттіліктер үшін арнайы ұшақтар сатып алу мүмкіндігін қосымша қарастыру жоспарлануда», – деп атап өтті премьер-министр.

Бұдан бөлек, Қаржы нарығын реттеу және дамыту агенттігі мен Ұлттық банк сақтандыру секторын дамытудың 2030 жылға дейінгі бағдарламасының жобаларын және сақтандыру қызметі туралы жаңа заңды әзірлеуде. Осы жұмыс аясында мемлекеттік органдар бұл саладағы мемлекеттік-жекеменшік серіктестік форматын кеңейту және оның әлеуетін нығайту мәселелерін қарастырады.