Әлеуметтік желілер мен БАҚ беттерінде қазақ кино өнерінің інжу-маржаны – «Қыз Жібек» фильмінде басты рөлді сомдаған Меруерт Өтекешованың киген тарихи қамзолына қатысты мәселе қызу талқыға түскен еді. Аталған жәдігер продюсер Баян Алагөзованың қолына түскенінен кейін біршама сұрақтар туындаған.
Осыған орай, ҚР Мәдениет және ақпарат вице-министрі Евгений Кочетов Парламент кулуарында мәселенің мән-жайын түсіндірді.
Түпнұсқа ма, әлде көшірме ме?
Евгений Кочетовтың айтуынша, қазіргі уақытта министрлікке қарасты музей қорларында аталған тарихи фильмнің түпнұсқа костюмдері сақталған. Дегенмен қоғамда талқыланып жатқан нақты қамзолдың заңды мәртебесін анықтау қажет.
«Қазақфильм» киностудиясының алтын қорында және біздің орталық музейлерде фильм түсіріліміне пайдаланылған бірегей киімдер бар. Бірақ дәл осы айтылып жатқан қамзолдың тарихын, оның қашан және қалай жеке тұлғалардың қолына өткенін немесе оның нақты түпнұсқа екенін сараптама арқылы тексеруіміз керек», – деді Кочетов.
Министрлік жәдігерді қайтаруға дайын ба?
Вице-министр егер қамзолдың шын мәнінде тарихи құндылығы дәлелденсе, мемлекет оны музей қорларына қайтару үшін тиісті шараларды қабылдауға әзір екенін жеткізді.
Арнайы комиссия құрып, костюмнің матасын, тігісін және тарихи сәйкестігін тексеру үшін кинотанушылар мен реставраторлардан құралған сарапшылар тобы тартылады. Экспонат анықталған жағдайда, ұлттық мәдени мұра ретінде мемлекеттік деңгейде қорғалатын болады.
«Біз үшін әрбір тарихи реквизит, әсіресе қазақ киносының символына айналған «Қыз Жібек» фильмінің мұрасы өте қымбат. Сондықтан бұл мәселені назардан тыс қалдырмаймыз», – деп түйіндеді Кочетов.
Еске сала кетейік, бұған дейін белгілі продюсер Баян Алагөзова өзі сыйлыққа алған «Қыз Жібектің» қамзолын Меруерт Өтекешоваға қайтарып берген еді.
