Ақтауда пластикалық операция жасатуға барған депутат қайтыс болды

Маңғыстау облысында пластикалық операциядан кейін мәслихат депутат Ербол Айтуов көз жұмды. «Ақ Жайық» редакциясының жазуынша, депутаттың нақты қай күні қайтыс болғаны жергілікті нотариуста ашылған мұрагерлік іс құжаттарында көрсетілген. Соған сәйкес, 49 жастағы ер адам 2026 жылдың 5 мамырында қайтыс болған.

Сәуірдің басында Айтуов «Қасиет» клиникасына липосакция жасатуға барған. Алайда наркоз кезінде жағдайы күрт нашарлап, комаға түскен. Жұбайының айтуынша, күйеуі инсульт алған. Сондай-ақ ол клиника уақытында көмек көрсетпей, науқастың нақты жағдайын жасырды деп мәлімдеген. Бір айдан кейін пациент көз жұмды.

Клиникаға тексеріс жүргізілді

Редакция Денсаулық сақтау министрлігі мекемеге жүргізген жоспардан тыс тексерістің нәтижесін де жариялады.

Соған сәйкес, клиникада ересектерге арналған анестезиология және реанимация қызметіне лицензия болмаған. Операциялық бөлім толық жабдықталмаған, ал кей құрылғының жарамдылық мерзімі өтіп кеткен.

Сонымен қатар тексеріс барысында науқасқа операция жасауға мүлде болмайтыны анықталған.

Алматыдағы жағдай

Бұған дейін Алматыдағы пластикалық хирургия клиникасында танымал блогер әрі кәсіпкер Сәуле Ермаханова ота кезінде кенеттен қайтыс болды. Содан кейін Денсаулық сақтау министрлігі ресми мәлімдеме жасап, істі ерекше бақылауға алғанын хабарлады.