«Ордабасы» «Қайратты» жеңіп, турнирлік кестеде бірінші орынға шықты
Футболдан Қазақстан Премьер-лигасының 12-туры аясында Шымкентте маусымның орталық кездесуі өтті. «Ордабасы» өз алаңында алматылық «Қайратты» қабылдап, тартысты өткен бәсекеде 2:1 есебімен жеңіске жетті. Бұл жеңістен кейін шымкенттік клуб турнирлік кестеде бірінші орынға шықты.
«Қайраттың» жылдам голы және Киламаның жауабы
Ойынды қонақтар белсенді бастады. Алматылықтар алғашқы минуттардан-ақ шабуылға лап қойып, матчтың 14-минутында есеп ашып үлгерді. «Қайраттың» португалиялық шабуылшысы Жоржиньо қақпаны дәл көздеп, қонақтарды алға шығарды. Бұл голдан кейін Жоржиньо маусымдағы 6-шы добын соғып, сұрмергендер жарысында көш бастады.
Алайда алаң иелері көп ұзамай ес жиды. Жіберілген голдан кейін шабуылды үдеткен «Ордабасы» бірінші тайм аяқталғанша таразы басын теңестіре алды. 28-минутта шымкенттік клубтың камерундық қорғаушысы Ги-Марселин Килама мергендік танытып, есепті 1:1-ге жеткізді.
Астановтың жеңіс добы және алматылықтардың алғашқы жеңілісі
Екінші таймда Андрей Мартин шәкірттері басымдықты толықтай өз қолдарына алды. Шымкенттіктердің үздіксіз шабуылдары 64-минутта өз жемісін берді: Қазақстан ұлттық құрамасының жартылай қорғаушысы Эльхан Астанов «Қайрат» қақпашысы Темірлан Анарбековті қапы қалдырып, командасына жеңіс сыйлаған маңызды голды соқты.
Осылайша, «Ордабасы» ерік-жігерінің арқасында маңызды үш ұпайға қол жеткізді. Ал «Қайрат» үшін бұл ағымдағы маусымдағы алғашқы жеңіліс болды, бұған дейін алматылықтар 18 матч бойы жеңілмей келген еді.
Турнирлік кестедегі жағдай
Осы турдан кейін ҚПЛ-дағы чемпиондық жарыс тіптен шиеленісе түсті. «Ордабасы» – 28 ұпаймен турнирлік кестеде жеке дара көш бастады. Сонымен қатар, шымкенттіктердің негізгі бәсекелестеріне қарағанда қоржынында тағы бір қосымша ойыны бар. Ал «Кайрат» – 26 ұпаймен екінші орынға сырғыды және олар көшбасшыға қарағанда бір ойынды артық өткізген.
«Ордабасы» осы жеңісі арқылы соңғы жылдары «Қайратқа» қарсы өткен сәтсіз сериясын бұзып, алтын жүлдеге басты үміткер екенін тағы бір мәрте дәлелдеді.
Еске сала кетейік, бұған дейін Kursiv Media Қазақстандағы ең қымбат 20 футболшының тізімін жазған еді.
