UFC-дің экс-жауынгері Азат Мақсұм ACA-мен келісімшартқа отырды
Аралас жекпе-жек бойынша қазақстандық жауынгер Азат Мақсұм мансабын ACA-да жалғастырады. Бұл туралы «Вестник MMA» Telegram-арнасы хабарлайды.
Дереккөздің мәліметінше, лигамен келісімге тағы бір қазақстандық жауынгер Жасұлан Әкімжан да қол қойған. Екі спортшы да промоушендегі дебютін 17 шілдеде Алматыда өтетін ACA 205 турнирінде жасауы мүмкін.
Мақсұмның мансабы
Мақсұм бұған дейін UFC-де өнер көрсеткен. Әлемнің ең мықты лигасында қазақстандық төрт жекпе-жек өткізді: біреуінде жеңіске жетіп, үшеуінде жеңілді. Жеңілістер сериясынан кейін UFC онымен келісімшартты ұзартпады. Ұйымдағы соңғы кездесуінде Мақсұм төрешілердің бірауыздан шешімімен америкалық Митч Рапозоға есе жіберді. Кәсіби ММА-да Мақсұмның еншісінде барлығы 15 жеңіс және үш жеңіліс бар.
UFC-ден кеткеннен кейін қазақстандық өзбекстандық Mangu Professional League ұйымымен келісімшартқа отырып, онда UFC-дің қазіргі жауынгері Рамазан Темировпен бразилиялық джиу-джитсу ережесі бойынша айқасқан болатын.
ACA деген не?
ACA немесе Absolute Championship Akhmat – еуразиялық ең ірі ММА-промоушендердің бірі. Лига аралас жекпе-жек бойынша турнирлер өткізіп, әртүрлі елдердің жауынгерлерін біріктіреді. Мақсұм үшін ACA-ға ауысу UFC-ден кейін мансабын қайта жандандыруға және тұрақты түрде өнер көрсетуге оралуға мүмкіндік болуы мүмкін.
