Қызылорда облысының полициясы маньяк туралы қауесетті жоққа шығарды

Қызылорда облысының Полиция департаменті өңірде адам өлтіруші маньяк жүр деген қауесетті жоққа шығарды. Сонымен қатар, полиция облыста екі күн ішінде екі адам өлтірілгенін растады.

Қызылорда облысында бірнеше кісі өлтіру оқиғасы бір-бірімен байланысты болған деген қауесетті қазақстандықтар әлеуметтік желілер мен мессенджерлерде қызу талқылаған.

Өңірдің Полиция департаменті 3 маусым күні кешке Шиелі ауданының ауылдарының бірінде жергілікті тұрғын канал шлюзінен бойжеткеннің денесін тауып алғанын хабарлады. Оның жеке басы анықталды. Туыстарының айтуынша, ол бір күн бұрын үйден шығып, қайтып оралмаған. Полиция «Кісі өлтіру» бабы бойынша қылмыстық іс қозғады.

«Мессенджерлер арқылы таратылып жатқан ақпарат шындыққа жанаспайды. Полиция азаматтарды жалған ақпарат таратпауға және тек ресми дереккөздерге ғана сенуге шақырады. Сондай-ақ, көрінеу жалған ақпарат таратқаны үшін заңнамаға сәйкес жауапкершілік қарастырылғанын ескертеміз», – делінген хабарламада.

Тағы бір қайғылы оқиға өңірде 1 маусымда болды. Полиция Жаңақорған ауданының тұрғынын өлтіру фактісі бойынша қылмыстық іс қозғады. Күдікті ұсталып, соттың санкциясымен қамауға алынды.

Бұл қылмыстық істер бойынша тергеу жалғасуда. Тергеу мүддесі үшін егжей-тегжейлі мәліметтер жарияланбайды.

Айта кетейік, тура қазір Атырау облысында 2025 жылдың 25 желтоқсанында орын алған 4 адамның өліміне қатысты іс сотта қаралып жатыр.