Павлодарда Назарбаев зияткерлік мектебінде оқитын 13 жастағы Әмірхан Асанов Threads желісінен айына 200 мың табады. Ол үшін күнінен жарты сағат қана уақыт жұмсайды деп жазады Digital Business.
Бір посты 3 минутта жазады
Әмірхан бастапқыда ТикТок пен Ютуб үшін UGC-контент дайындаған. ЖИ арқылы қысқа видеолар дайындап, жариялайтын. Кейде мектеп оқушыларына пайдалы сайттар мен тренингтерге шолу жасайды. Оның бейнежазбалары тез таралып, миллиондаған қаралым жинай бастайды. Осыдан кейін Әмірхан ол ресурсты монетизациялауды ойлайды.
Осы кезде оған IELTS емтиханына дайындайтын орталықтардың бірінен ұсыныс түседі. Оқушы олар үшін Threads-ке пост жазып, оған платформаның нативті жарнамасын да қосады. Сол жазбадағы сілтеме арқылы оқырман платформаға өтіп, қызметті сатып алған сайын Әмірханға әр чектен 11% табыс түседі. Осы әдіспен мектеп оқушысы айына тұрақты түрде 200 мың теңге табады.
Бұл үшін НЗМ шәкірті ЖИ-ді тұрақты пайдаланады. Мәселен, Gemini арнайы тапсырыспен сурет дайындайды, Claude идея жағынан көмектеседі, ал ChatGPT трендтерге терең талдау жасап береді. Осының арқасында Әмірхан бір жазбаға орта есеппен 3-4 минут уақыт жұмсайды. Ол посттарды өзім жазатынын айтты.
Ал жазбаларын 17:00-20:00 аралығында шығарады. Дәл сол уақытта мақсатты аудитория мектептен, жұмыстан келіп, әлеуметтік желіге отырады. Әр сағат сайын бір жазба салып отыруға тырысады.
Жеке ІТ жоба жасауға көшпекші
Бірақ Әмірхан осымен тоқтамақ емес. UGC блогер ретінде тәжірибе жинаған ол жеке ІТ жоба жасауға ниеттеніп жүр. Досымен бірге nisonline.asia атты білім беру платформасын дайындауға кіріскен. Ол оқушыларға мемлекеттік емтиханнан өтіп, НЗМ, «Дарын» тәрізді мектептерге түсуге көмектеседі. Әзірге жоба жартылай дайын, әрі қарай біраз жұмыс істеу керек дейді жас дарын.
Тағы да оқыңыз: Орта мектеп бітірген қазақ қызы әлемнің 80 оқу орнынан шақыру алды
