Павлодарда оқушы мен студент құрдастарынан ақша бопсалады деп күдікке ілінді

Павлодарда оқу орнында бопсалау деректерінің жолы кесілді. Оқушы мен колледж студенті құрдастарынан ақша бопсалады деп күдікке ілінді, деп хабарлайды Polisia.kz.

Бірінші жағдай Павлодарда орын алды. Екі оқушы құрдастарынан ақша бопсалады деп күдіктелуде, сонымен қатар олар бағалы заттарды ломбардқа өткізуді талап еткен. Кейбір эпизодтарда қысым жасау үшін компроматтық бейнематериалдар пайдаланылған.

Екінші жағдайда Екібастұзда колледждің кәмелетке толмаған оқушысы ұсталды, ол танысымен бірге 50 мың теңге бопсалады деп күдіктелуде. Жәбірленушіні автокөлікпен алып кетіп, оған дене жарақатын салған.

«Күдіктілер ақшалай қаражатты беру кезінде ұсталды. Екі факті бойынша қылмыстық іс қозғалды», – деді Павлодар облысы ПД ҰҚКБ бастығы Ғабит Қабдрахманов.

Құқық қорғау органдары басқа да ықтимал қатысушыларды анықтауды жалғастыруда және қосымша эпизодтардың бар-жоғын тексеріп жатыр.

Айта кетейік, бұдан бұрын үндістандық студент әлеуметтік желіде әлімжеттік көргенін мәлімдеген.