Үш қызыл қағаз: Мексика әлем чемпионатының алғашқы ойынында жеңіске жетті

Футболдан 2026 жылғы Әлем чемпионатының ашылу матчында алаң қожайындарының бірі – Мексика құрамасы Оңтүстік Африка командасын қабылдап, 2:0 есебімен маңызды жеңіске жетті.

Тартысты өткен кездесуде мексикалықтар өз жанкүйерлерінің алдында жоғары дайындық пен шабуылдағы тиімділікті көрсете білді.

Бірінші тайм: Жылдам гол және басымдық

Ойын басталған сәттен-ақ Мексика құрамасы допқа иелік етіп, қарсыластың қорғанысын бұзуға тырысты. Бұл қысым көп күттірген жоқ. Ойынның 9-минутында Э. Лираның тамаша пасынан кейін Х. Киньонес есеп ашып, стадионды дүр сілкіндірді.

Бірінші таймда Оңтүстік Африка футболшылары дөрекі ойнап, 17-минутта Т. Мокоена сары қағаз алса, Мексика сапынан 23-минутта Б. Гутьеррес те ескерту алды. Алғашқы 45 минут 1:0 есебімен алаң иелерінің пайдасына аяқталды.

Екінші тайм: Қызыл қағаздар мен нүкте қойған гол

Екінші кезең Оңтүстік Африка үшін сәтсіз басталды. 49-минутта С. Ситоле тікелей қызыл қағаз алып, алаңнан қуылды. Бір ойыншысы кем қалған қонақтар қорғанысқа көбірек көңіл бөлуге мәжбүр болды.

Мексика құрамасы бұл басымдықты сәтті пайдаланды. Бас бапкердің дер кезінде жасаған ауысымдары ойынға жаңа леп әкелді. 67-минутта Р. Альварадоның ассистенттігімен Р. Хименес есепті 2:0-ге жеткізіп, командасының жеңісін нықтай түсті.

Матч соңына қарай эмоцияға ерік берген Оңтүстік Африка құрамасы тағы бір шығынға ұшырады. 84 минутта Т. Зване де қызыл қағаз алып, алаңнан қуылды. Осылайша, қонақтар кездесуді 9 ойыншымен аяқтады.

Ал ойынның қосылған қосымша уақытында Мексиканың да ойыншысы Монтес ойын тәртібін өрескел бұзып, алаңнан қуылды.

Мексика құрамасы Әлем чемпионатының 1-турында маңызды 3 ұпайға қол жеткізіп, турнирді сәтті бастады.

Айта кетейік, бұл ойын алдында Әлем чемпионатының ашылу салтанаты өткен еді.