Арнайы мәртебеге ие Алатау қаласында «Өркен фильм» киностудиясы салынады. Бұл туралы осы компанияның директоры, кинопродюсер Айгүл Сайынова Facebook-тегі парағына жазды.
«Біз төл киностудиямызды салу үшін инвестициялық келісімге қол қойдық», – деп жариялады Сайынова.
Топ-менеджер Kursiv.Media тілшісіне жекеменшік жаңа киностудияның Алатау қаласында, компанияның өз қаражатына салынатынын айтты.
Кәсіпкер киностудия орналасатын жерді таңдау барысында оның табиғи жағдайына мән берілгенін де атап өтті.
«Алматының 100 км радиусында бір уақытта бес түрлі климаттық жағдайда фильм түсіруге болады», – деп есептейді продюсер.
«Өркен фильм» 2007 жылы «Ярик» көркем фильмін түсіріп, халықаралық байқауларда жоғары бағаланған.
Естеріңізге сала кетейік, «Алатау қаласының ерекше құқықтық режимі туралы» конституциялық заң жобасын парламент 2026 жылғы 27 наурызда қабылдады. Президент өткен аптада «ақылды қала» жобасын Брюссельде таныстырды.
