Google Nano Banana 2 Lite атты жаңа сурет генераторын таныстырды. API жүйесінде ол gemini-3.1-flash-lite-image деп аталады. Бұл Nano Banana отбасындағы ең жылдам әрі ең арзан модель.
Компанияның мәліметінше, жаңа модель 1K сапасындағы суретті шамамен 4 секундта жасап береді. Бір суреттің бағасы – 0,034 доллар (шамамен – 16 теңге). Модель Google AI Studio, Gemini API және Gemini Enterprise Agent Platform арқылы әзірлеушілерге қолжетімді. Сонымен қатар ол біртіндеп Google Search-тегі AI Mode, Gemini қосымшасы, NotebookLM, Google Photos, Stitch, Flow және Google Ads қызметтеріне енгізіліп жатыр.
Google Nano Banana 2 Lite моделін бірінші Nano Banana моделінің орнына қолдануға болатын нұсқа ретінде ұсынып отыр. Әсіресе жылдамдық пен баға маңызды болған жағдайда бұл модель тиімді болуы мүмкін.
Жылдамдық сапаны төмендетеді
Әрине, жылдамдық артқан сайын сапа жағынан белгілі бір айырмашылық болады. Бірақ айырма аса үлкен емес. lmarena.ai рейтингінде Nano Banana 2 Lite 1251 балл жинаған. Ал толыққанды Nano Banana 2 көрсеткіші – 1270 балл. Яғни Lite нұсқасы сәл әлсіздеу болғанымен, көптеген бәсекелес модельден алда тұр.
Мысалы, сол рейтингте Grok Imagine Image – 1174 балл, Seedream v5 Lite – 1132 балл, Flux 2 Klein 9B – 1069 балл жинаған. Google-дың айтуынша, Lite нұсқасы промптты жақсы түсінеді, кейіпкерлердің бірізділігін сақтайды және сурет ішіндегі мәтінді оқуға ыңғайлы етіп бере алады.
Бұл модельдің шығуының басты себебі – жылдамдық. Толық Nano Banana 2 жасанды интеллект тұрғысынан күштірек болғанымен, artificialanalysis.ai өлшемі бойынша бір сурет жасауға шамамен 20 секунд жұмсайды. Бұған ойлау режимдері мен веб-іздеу мүмкіндіктерінің қосылуы әсер еткен. Ал алғашқы Nano Banana шамамен 7 секундта жұмыс істеген.
Nano Banana 2 Lite осы бос орынды толтырады: ол күрделі емес, бірақ тез нәтиже керек кезде ыңғайлы. Яғни Google жылдам сурет генерациясы сегментін қайта күшейткісі келеді.
Gemini қосымшасында бұл модельді пайдалану үшін диалог терезесінде 3.1-Flash-Lite нұсқасын таңдау керек. Ең тиімді қолдану жолы – алдымен түрлі промпттарды Nano Banana 2 Lite арқылы тез сынап көру. Кейін ең сәтті шыққан нұсқаларды сапасы жоғары Nano Banana 2 моделінде қайта жасауға болады.
Тағы да оқыңыз: OpenAI өз чипін шығарды: Nvidia-ға тәуелділік азая ма?
