Ақылы жолдарға абонементті қалай және қаншаға алуға болады

«ҚазАвтоЖол» ұлттық компаниясы ақылы жолдармен жиі жүретін жүргізушілер үшін айлық және жылдық абонементтердің бағасы мен оны рәсімдеу жолдарын еске салады.

Абонементті ақылы жол учаскесіне іргелес аудандарда тіркелген және жол ақысынан қарызы жоқ көлік иелері ғана ала алады. Тіркеу мәліметтері ҚР ІІМ деректер қоры арқылы автоматты түрде тексеріледі.

Абонементтердің құны

Жеңіл көліктер үшін: Тек жылдық абонемент қарастырылған. Құны — 1 АЕК (4 325 теңге).
Автобустар мен жүк көліктері үшін: Бағасы көліктің сыйымдылығы мен жүк көтергіштігіне, сондай-ақ жолдың санатына (I, II, III) байланысты.

Негізгі тарифтер (айлық/жылдық):

Шағын автобустар мен жүк көліктері (2.5 тоннаға дейін): Айлық — 4 325-тен 8 650 теңгеге дейін; Жылдық — 51 900-ден 86 500 теңгеге дейін.
Үлкен автобустар мен ауыр жүк көліктері (15 тоннадан жоғары): Айлық — 21 625-тен 43 250 теңгеге дейін; Жылдық — 259 500-ден 432 500 теңгеге дейін.

Абонементті рәсімдеудің 3 оңай жолы

1403 байланыс орталығы арқылы: Көлік теңгерімін абонемент құнына сәйкес толтырып, 1403 нөміріне қоңырау шалу қажет.
Онлайн: Kaztoll.kz сайтында тіркеліп, көлік деректерін енгізу және «Абонементті рәсімдеу» бөлімінде қажетті тарифті таңдау.
Офлайн: Кез келген ақы төлеу пунктіне немесе Клиенттермен жұмыс істеу орталығына барып, оператор арқылы рәсімдеу (төлемді картамен, қолма-қол немесе интернет-банкингпен жасауға болады).

Абонементті алдын ала рәсімдеу уақыт пен жол шығынын айтарлықтай үнемдеуге мүмкіндік береді.