Қазақстанда тұрғын үй мәмілелері бір айда 28,4%-ға өсті
2026 жылғы маусымда Қазақстанда тұрғын үйді сатып алу-сату бойынша 39 053 мәміле тіркелді. Бұл мамыр айымен салыстырғанда 28,4%-ға немесе 8 633 мәмілеге көп.
Мамырда ел бойынша 30 420 тұрғын үй мәмілесі жасалған еді. Маусымда нарықтағы белсенділік барлық өңірде артқан.
2025–2026 жылдардағы тұрғын үйді сатып алу-сату мәмілелерінің серпіні
Алматы мен Астана көш бастады
Ең көп тұрғын үй саудасы Алматы қаласында тіркелді. Маусымда мегаполисте 6 841 мәміле жасалды. Бұл елдегі барлық мәміленің 17,5%-ына тең.
Екінші орында Астана тұр. Елордада бір айда 6 436 мәміле немесе жалпы көлемнің 16,5%-ы тіркелді.
Үшінші орынға 3 772 мәмілемен Қарағанды облысы шықты. Өңірдің үлесі 9,7%-ды құрады.
Ал тұрғын үй саудасы ең аз Ұлытау облысы. Мұнда маусым айында небәрі 360 мәміле тіркелген. Бұл жалпы көрсеткіштің 0,9%-ына тең.
Сатып алушылар көбіне пәтер таңдаған
Маусымда көппәтерлі үйлердегі баспаналар бойынша 29 432 мәміле жасалды. Бұл елдегі барлық тұрғын үй мәмілесінің 75,4%-ына тең.
Мамырмен салыстырғанда пәтер саудасының саны 25,9%-ға немесе 6 051 мәмілеге өсті.
Көппәтерлі үйлердегі мәмілелердің ең үлкен үлесі Астанаға тиесілі – 21,4%. Алматының үлесі 21,2%-ды, ал Қарағанды облысының үлесі 10,5%-ды құрады.
Бөлме санына қарай бір бөлмелі пәтерлерге сұраныс жоғары болған. Маусымда осындай баспаналар бойынша 11 348 мәміле тіркелді.
Жеке үйлердің саудасы да жанданды
2026 жылғы маусымда жеке тұрғын үйлер бойынша 9 621 мәміле жасалды. Бұл мамыр айымен салыстырғанда 36,7%-ға немесе 2 582 мәмілеге көп.
Жеке үйлер бойынша мәмілелер саны Шығыс Қазақстан облысынан басқа барлық өңірде өскен. Шығыс Қазақстан облысында көрсеткіш, керісінше, 1,4%-ға төмендеді.
Маусымдағы статистика Қазақстанның тұрғын үй нарығында белсенділіктің айтарлықтай артқанын көрсетеді. Әсіресе ірі қалалардағы пәтерлерге және өңірлердегі жеке үйлерге сұраныс күшейген
Тағы да оқыңыз: 2027 жылға қарай жаңа пәтерлер қымбаттай ма?
