Атырау – Ақтөбе пойызында жолаушы қайтыс болды: жолсеріктер жұмыстан қуылды

Атыраудан Ақтөбеге бағыт алған жолаушылар пойызында билетсіз мінген ер адам кенеттен көз жұмды. Оқиғаға байланысты жүргізілген қызметтік тексерістен кейін пойыз бастығы мен екі жолсерік жұмыстан босатылды. Бұл туралы Kazinform хабарлады.

«Жолаушылар тасымалы» компаниясының мәліметінше, қайғылы жағдай 2026 жылдың 13 шілдесінде № 691/692 жолаушылар пойызы Қандыағаш – Ақтөбе учаскесінде келе жатқанда орын алған.

Пойыз бастығының рапортына сәйкес, жолаушының билеті болмаған. Оны вагонға жолсерік заңсыз отырғызған.

Сапар барысында ер адам кенеттен қайтыс болған. Компания өкілдері бұл вагонның 2023 жылы шығарылғанын, ішіндегі кондиционер штаттық режимде жұмыс істеп тұрғанын және температуралық режим нормаға сай болғанын атап өтті.

Пойыз Ақтөбе станциясына жеткен бойда марқұмның денесі қажетті процессуалдық әрекеттерді жүргізу үшін құзырлы орган қызметкерлеріне тапсырылды.

Қызметтік тексеріс

Оқиға орын алған күні-ақ тасымалдаушының «Батыс» филиалында ішкі қызметтік тексеру жүргізілді. Тексеріс қорытындысы бойынша вагонның екі жолсерігі мен пойыз бастығы жұмыстан қуылды.

Ақтөбе учаскесінің бастығы мен өндірістік оқыту нұсқаушысына қатаң сөгіс жарияланды.

Өлімнің алдын ала себебі және қылмыстық іс

Қазіргі уақытта Ақтөбе станциясындағы Желілік полиция бөлімінің қызметкерлері оқиғаның мән-жайын зерттеп жатыр.

«Атырау – Ақтөбе пойызында жолаушының кенеттен қайтыс болу фактісі бойынша Ақтөбе станциясының көліктегі полиция бөлімі қылмыстық іс қозғады. Қазіргі уақытта қажетті тергеу амалдары жүргізіліп жатыр. Алдын ала қойылған диагноз: екіжақты пневмония (өкпенің қабынуы). ҚР Қылмыстық-процестік кодексінің 201-бабына сәйкес, өзге ақпарат жария етуге жатпайды».

Бұған дейін, Маңғыстауда теміржол станциясының қызметкері жұмыс орнында қайтыс болған еді.