Екібастұзда төтенше жағдай режимі жарияланды

Екібастұз әкімдігі кешеден бері жауған жойқын бұршақтан кейін қалада төтенше жағдай режимін жариялады. Тиісті шешім жобасы «Ашық НҚА» порталында жарияланды.

Құжатта Екібастұзда «2026 жылғы 19 шілдеде орын алған гидрометеорологиялық құбылысқа» байланысты жергілікті ауқымдағы табиғи сипаттағы ТЖ жарияланғаны айтылған. ТЖ жариялау өткен демалыс күндері Павлодар облысын басқан күшті бұршақтың зардабын жою үшін қажет.

Шешім оның алғашқы ресми жарияланған күнінен бастап қолданысқа енгізіледі.

19 шілдеде Павлодар облысында қатты жел тұрып, нөсер жауын жауып, ірі бұршақ жауды.

Қолайсыз ауа райының салдарынан алты адам, соның ішінде үш жасөспірім зардап шекті, олардың барлығына медициналық көмек қажет болды.

Куәгерлердің айтуынша, алдымен аздап жаңбыр жауған, кейін жел кенет күшейіп, найзағай ойнап, ірі бұршақ жауа бастаған.