АҚШ Иранға қарсы әуе соққыларын жалғастырып жатыр

АҚШ Қарулы күштері Иранға қатарынан тоғызыншы түн әуе соққыларын жасады. Бұл туралы АҚШ-тың Орталық қолбасшылығы (CENTCOM) X әлеуметтік желісінде хабарлады.

CENTCOM мәліметінше, соққылар Иранның әскери басқару орталықтарына, әуе қорғанысы нысандарына, жағалаудағы бақылау бекеттеріне, зымырандар мен ұшқышсыз ұшу аппараттарын ұшыру орындарына, сондай-ақ байланыс құралдарына бағытталған.

«Орталық қолбасшылық Иран аумағына қатарынан тоғызыншы кеш әуе соққыларын жасауды аяқтады», – делінген CENTCOM-ның X әлеуметтік желісіндегі хабарламасында.

CENTCOM өкілдерінің мәлімдеуінше, АҚШ Қарулы күштері бұл операцияларды Жоғарғы бас қолбасшының бұйрығына сәйкес жүргізіп, Иранды өз әрекеттері үшін жауапқа тартып отыр.

Операцияның мақсаты – Иранның Ормуз бұғазы арқылы өтетін коммерциялық кемелер мен азаматтық теңізшілерге шабуыл жасау мүмкіндігін шектеу.

Айта кетейік, АҚШ Иранға қысымды күшейтіп, Иран порттарына қатысты теңіз блокадасын қайта енгізген. Бұған дейін Вашингтон Тегеранды Ормұз бұғазындағы коммерциялық кемелерге қауіп төндірді деп айыптаған. Иран болса мұны қысым саясаты деп бағалап отыр.

Еске салайық, бұған дейін Парсы шығанағындағы жағдай қайта шиеленіскені хабарланған еді. АҚШ Иран аумағына әуе соққыларын жалғастырса, Тегеран Ормуз бұғазындағы оқиғаларға қатысты мәлімдеме жасаған.