Haval қиғаш бағытта да қозғала алатын жаңа H10 кроссоверінің сатылымын бастады
Haval компаниясы жаңа H10 флагмандық кроссоверінің сатылымын бастады. 5,3 метрге дейін жететін гибридті жол талғамайтын көліктің тіпті бастапқы нұсқасына лазерлік қашықтықты анықтау (лидар) жүйесі енгізілген. Сондай-ақ көлік диагональ бағытта қозғала алатын Crab Walk режимімен жабдықталған. Бұл туралы CarNewsChina хабарлады.
Haval желісіндегі ең ірі кроссовер
H10 – Haval брендінің ең ірі кроссовері болмақ. Оның ұзындығы 5299 мм, ал дөңгелек базасы 3000 мм. Модель Guiyuan платформасына негізделген. Бұл платформа Wey V9X моделінде де қолданылады. Алайда H10 көтергіш шанақпен (монокок кузов) жабдықталған.
Қиғаш бағытта қозғала алады
Жолсыз жерде жүруге арналған H10 бірнеше технологиямен жабдықталған. Атап айтқанда, клиренсі 220 мм, жеті жолсыз режимі бар бейімделетін аспасы, артқы дифференциалдың электрондық бұғаттау жүйесі және тар кеңістікте маневр жасауды жеңілдететін Crab Walk («краб режимі») қарастырылған. Бұл режим көліктің қиғаш бағытта қозғалуына мүмкіндік береді.
600 ат күшіне жуық қуат және 1400 шақырымға дейінгі жүріс қоры
Барлық нұсқалар 1,5 литрлік турбомотор мен 42,8 кВт·сағ батареядан тұратын екінші буындағы Hi4 қосылатын гибридті жүйесімен жабдықталған.
Қуат қондырғысының жалпы өнімділігі 598 ат күшіне жетеді. Кроссовер 0-ден 100 км/сағ жылдамдыққа 4,9 секундта жетеді, ал толық жүріс қоры 1404 шақырымға дейін.
Тек электр қуатымен H10 WLTC стандарты бойынша 180 шақырымға дейін жүре алады. Өндіруші мәліметінше, орташа отын шығыны 100 шақырымға 0,87 литрді құрайды. Ал батарея толық таусылған кезде бұл көрсеткіш 100 шақырымға 6,6 литрге дейін өседі.
Үш экран және жүргізушіге көмек көрсету жүйесі
Кроссовердің барлық жабдықталымдары лидармен және Coffee Pilot 3 жүргізушіге көмек көрсету жүйесімен жабдықталған. Бұл жүйе тас жолда және қала ішінде жартылай автоматты жүргізуді, автоматты тұраққа қоюды және алдын ала сақталған бағыт бойынша жүруді қолдайды.
Салонда 15,6 дюймдік орталық мультимедиа экраны, 29 дюймдік проекциялық дисплей және артқы жолаушыларға арналған төбедегі экран орнатылған.
Бұдан бөлек, H10 кіріктірілген тоңазытқышпен, екінші қатардағы жиналмалы үстелшемен және кең жүксалғышпен жабдықталған.
Haval H10 нарыққа бренд үшін оңай кезеңде шығып отырған жоқ. China EV DataTracker деректеріне сәйкес, 2026 жылдың маусымында Haval-дың Қытайдағы сатылымы өткен жылдың сәйкес кезеңімен салыстырғанда 41,3%-ға төмендеп, 20 мың көлікке дейін азайған.
Компания жаңа H10 моделі ірі гибридті кроссоверлер сегментіндегі позициясын нығайтып, сатылым көлемін арттыруға ықпал етеді деп үміттенеді.
